सगरमाथा शिखरमा ११ भारतीय महिला सुरक्षाकर्मी, भारत सरकारका गृहमन्त्रीले दिए वधाइ

ओखलढुङ्गा : नेपालतर्फको दक्षिणी रुट हुँदै ११ जना भारतीय महिला सुरक्षाकर्मीहरूले विश्वको सर्वोच्च शिखर सगरमाथा (८,८४८.८६ मिटर) को सफल आरोहण गरेर नयाँ इतिहास रचेका छन् । भारतको केन्द्रीय गृह मन्त्रालय मातहत रहेको भारत–तिब्बत सीमा पुलिस (आइटीबिपी) को इतिहासमै यो पहिलो पटक महिला मात्र सम्मिलित टोलीद्वारा गरिएको सगरमाथा आरोहण अभियान हो ।

भारत सरकारका गृहनन्त्री अमित शाहले सामाजिक सञ्जाल एक्समार्फत  बधाइ दिदै आरोहणको पुष्टी गरेका छन् । प्राप्त जानकारी अनुसार २१ मे २०२६ का दिन बिहान ६ः५२ बजे टोलीका पहिलो सदस्यले सगरमाथाको शिखरमा पाइला टेकेका थिए । त्यसको केही समयभित्रै आरोहण दलमा सहभागी सबै ११ जना महिला पर्वतारोहीहरू सफलतापूर्वक शिखरमा पुग्न सफल भएका थिए । अत्यधिक जोखिम र चुनौतीपूर्ण मौसमका बीच पनि टोलीका शतप्रतिशत सदस्यले शिखर चुम्नुलाई पर्वतारोहण क्षेत्रमा एउटा ठूलो र दुर्लभ उपलब्धिको रूपमा हेरिएको छ । 

भारतका गृहमन्त्री शाहले  सम्पूर्ण टोलीलाई बधाई दिँदै ‘नारी शक्ति’ (महिला सशक्तिकरण) र कठोर प्रशिक्षणको परिणाम भएको बताएका छन् । ‘दुर्गम हिमाली सीमा सुरक्षामा खटिने यी महिला ‘हिमवीर’ हरूको साहसले विश्वभरकै महिलाहरूलाई प्रेरित गर्ने’ जनाएका छन् ।

शिखरमा भारतको राष्ट्रिय झण्डा र आइटीबिपीको झण्डा फहराएपछि ११ जनाकै टोली अहिले सुरक्षित रूपमा तल्लो क्याम्पहरू हुँदै आधार शिविरतर्फ ओर्लिने क्रममा रहेको छन् । यसैबीच बिहारका पूर्व मुख्यमन्त्री नितिशकुमारले सफलतापूर्वक सगरमाथा आरोहण गर्ने सुरक्षा निकायका महिलाहरूलाई बधाई ज्ञापन गरेका छन् ।

उनले सामाजिक सञ्जाल फेसबुकमार्फत उनीहरूको साहस र दृढ संकल्पको प्रशंसा गरेका छन् उनले लेखेका छन्, ‘आईटीबीपीका वीर महिला पर्वतारोहीहरूद्वारा माउन्ट एभरेष्ट (सगरमाथा) मा तिरंगा फहराउनु गौरवको विषय हो । यस एक्सपीडिसन (अभियान) का सबै ११ जना महिला पर्वतारोहीहरूलाई हार्दिक बधाई तथा शुभकामना । तपाईंहरूको साहस र दृढ संकल्प प्रशंसनीय छ ।’