जाजरकोट : आगामी फागुन २१ गते हुने प्रतिनिधि सभा सदस्य निर्वाचनका लागि जाजरकोटमा मतपत्र आइपुगेको छ । जिल्ला निर्वाचन कार्यालय जाजरकोटका अनुसार प्रत्यक्षतर्फ एक लाख १५ हजार र समानुपातिकतर्फ एक लाख १८ हजार मतपत्र जिल्लामा प्राप्त भएको मुख्य निर्वाचन अधिकृतको कार्यालयले जनाएको छ ।
निर्वाचनका लागि आवश्यक मतपत्र सुरक्षित रूपमा ल्याएर व्यवस्थापन गरिएको कार्यालयले जनाएको छ । जिल्लामा कुल एक लाख ७ हजार ९३ मतदाता रहेका छन् । मतदाताको सङ्ख्यालाई आधार मानी आवश्यकताभन्दा केही बढी मतपत्र पठाइएको प्रमुख जिल्ला अधिकारी राजुप्रसाद पौडेलले बताए ।
जिल्लामा प्रतिनिधि सभा सदस्य पदका लागि ११ राजनीतिक दल चुनावी मैदानमा उत्रिएका छन् । निर्वाचनलाई स्वच्छ, निष्पक्ष र मर्यादित बनाउन सम्पूर्ण तयारी तीव्र पारिएको कार्यालयले जनाएको छ ।
फागुन २१ गते हुने मतदानका लागि मतदान केन्द्रको व्यवस्थापन, कर्मचारी खटाउने तथा सुरक्षा प्रबन्धका कामहरू अन्तिम चरणमा पुगेका छन् । जिल्ला निर्वाचन कार्यालयले मतदातालाई निर्धक्क भएर मतदानमा सहभागी हुन आग्रह गरेको छ ।
प्रतिक्रिया दिनुहोस !
