अलिकति आकाश,
अलिकति आगो
मात्रामा १९–२० को फरक होला
तर के पञ्चतत्त्वकै सिर्जना होइनन् समग्रमा
सृष्टि, स्थिति र प्रलयका कथा ?
कुन चाहिँ माइकालाल भन्न सक्छ,
आणविक परीक्षणका बेला
लस अलामोसमाथि देखिएको
वामनावतार सदृश मसरुम क्लाउड
पञ्चतत्त्वको सिर्जना होइन भनेर ?
अनि सोही दृश्यपश्चात् पञ्चतत्त्व सन्तुलन बिग्रँदा
ओ जे ओपनहाइमरले सन्तुलन गुमाएको होइन भनेर ?
पञ्चतत्त्वकै सिर्जना होइनन् ?
इनोला गे, लिटल ब्याय र फ्याट म्यान
जसले पञ्चतत्त्वका दुई सुन्दर सिर्जना
हिरोसिमा र नागासाकी सखाप पारे।
पञ्चतत्त्वकै सिर्जना होइनन् ?
भक्तका वीर, रामका अनन्य सेवक हनुमान
जसले पञ्चतत्त्वमय अशोक बाटिका सखाप पारे ?
पञ्चतत्त्वकै सिर्जना होइन
त्यो मित्सुबिसी पजेरो
जो पञ्चतत्त्वनिर्मित दुई प्रसिद्ध शरीरसहित
त्रिशूलीमा खसेर रहस्यको गर्भमा भेटियो ?
पञ्चतत्त्वकै सिर्जना होइनन्
दिल्ली, ब्रसेल्स, बकिंहम अनि वासिंटन दरबार
जसको निर्देशनमा यो पञ्चतत्त्वले बनेको भूस्वर्ग
भीरतिर अग्रगामी पाइला चाल्दैछ
पञ्चतत्त्वको पञ्चतत्त्वसँगको बैर
साँच्चै बुझिनसक्नु छैन त ?
के पञ्चतत्त्वले बनेको होइन
आगो ओकल्ने बन्दुक ?
खाली मात्राको फरक न हो
भरुवा बन्दुक त पड्किन्छ यदाकदा
जिम्दार बाका छोरानातिको बिहेमा
इन्सास एनफिल्ड त पड्किन्छ
युद्धकालमा ब्याडलक खराब नभएको बेला
नारायणहिटीमा अत्याधुनिक बन्दुक
हलचल हुनु कुन आश्चर्य भो ?
कि कसो पञ्चतत्त्वातीत, इन्द्रियातीत प्रभु ?
प्रतिक्रिया दिनुहोस !
