बागमती प्रदेश सभाको बैठक स्थगित
हेटौंडा : बागमती प्रदेश सभाको आज बिहान ११:३० बजे बस्ने भनिएको बैठक विशेष कारणले स्थगित गरिएको प्रदेश सभा सचिवालयले जनाएको छ। सचिवालयले सूचना टाँस गरी भोलि फागुन १७ गते विहान ११:३० बजे बैठक बस्नेसमेत जनाएको छ।
प्रदेश सभाको वर्षे अधिवेशनको असारमा बजेट प्रस्तुत गर्ने क्रममा प्रमुख प्रतिपक्ष लगायतका दलहरूले असन्तुष्टि जनाई संसद केही दिनको लागि अवरुद्ध गरेपछि प्रदेश सरकार र प्रतिपक्षी दलहरुको बीचमा ३ बुँदे सहमति भएको थियो।
उक्त सहमति हाल हिउँदे अधिवेशन सुरु हुँदा पनि प्रदेश सरकारले कार्यान्वयन गर्न नखोजेको र प्रतिपक्षी दलहरूले पटक-पटक सरकारको ध्यानाकर्षण गराउँदा पनि सरकारले आफ्नो तर्फबाट कुनै आश्वासन दिन नसकेको कारणले आजको बैठक स्थगित भएको नेकपा एमाले संसदीय दलका सचेतक मधुसुदन प्रसाद पौडेल र राप्रपा संसदीय दलका नेता उद्धब थापाले बताए।