सुदूरपश्चिमको मुख्यमन्त्रीमा नेकपा एसले सोडारीलाई उम्मेदवार बनाउने
वैशाख ५, २०८१ बुधबार १६:३७:५६
काठमाडौं : नेपाल कम्युनिष्ट पार्टी (एकीकृत समाजवादी) पार्टीले सुदूरपश्चिम प्रदेशको मुख्यमन्त्रीका लागि दीर्घ सोडारीलाई उम्मेदवार बनाउने निर्णय गरेको छ ।
पार्टी केन्द्रीय कार्यालय आलोकनगरमा बुधबार बसेको ८०औँ सचिवालय बैठकले सुदूरपश्चिम प्रदेशसभाका संसदीय दलका नेता सोडारीलाई मुख्यमन्त्रीको उम्मेदवार बनाउने निर्णय गरेको सो पार्टीका उपमहासचिव एवं प्रवक्ता जगन्नाथ खतिवडाले जानकारी दिए।
उनका अनुसार पार्टीको १०औँ महाधिवेशनको तयारी लगायतका विषयमा सो बैठकमा छलफल भएको थियो ।
तर,नेकपा एमालेले मुख्यमन्त्रीमा सोडारीको विकल्प खोज्न अडान लिएको छ । एमालेको सोडारीको विकल्प खोज्ने अडानले मुख्यमन्त्रीको दाबी पेश गर्ने तयारी अहिलेसम्म रोकिएको छ । एमालेले सोडारी बाहेक जुनसुकै प्रदेश सभा सदस्य भएपनि मुख्यमन्त्रीमा सहमति जनाउने बताएको छ । माओवादी,एमालेका संसदीय दलका नेताहरूले समाजवादीका प्रकाश रावल र माया पन्त जो भएपनि मुख्यमन्त्रीमा पठाउन आग्रह गरेका छन् ।
एकीकृत समाजवादीको नेतृत्वमा एमाले,माओवादी केन्द्र,नागरिक उन्मुक्ति (रञ्जिता पक्ष) र स्वतन्त्र सांसदको समर्थनमा बुधबार बिहान दाबी पेस गर्ने तयारी गरिएको थियो । मंगलबार राति नै एकीकृत समाजवादी सुदूपश्चिमले संसदीय दलका नेता सोडारीलाई मुख्यमन्त्रीमा अगाडि सार्ने निर्णय पनि गरिसकेको छ ।
तर, एमालेले सोडारीलाई मुख्यमन्त्रीमा समर्थन गर्न नसकिने अडान लिएपछि अन्यौलता देखिएको छ ।
समाजवादीले मंगलबार कांग्रेससहितको समर्थनमा नागरिक उन्मुक्तिका लक्ष्मण किशोर चौधरीलाई दिएको समर्थन फिर्ता लिएको थियो । प्रदेश प्रमुख नजीर मियाले नागरिक उन्मुक्तिकै दुईजनाको दाबी पेश हुन आएकोले निष्कर्षमा पुग्न नसकिएको जनाउँदै बिहीबार बेलुकी ५ बजे सम्मको म्याद दिएर संविधानको धारा १६८ (२) अनुसार दोस्रो पटक सरकार आह्वान गरेका छन्।
प्रतिक्रिया दिनुहोस !
