धादिङ : धादिङ प्रहरीले फरार प्रतिवादीको खोजी अभियान चलाइरहेका बेला ठूलो परिमाणमा अवैध लागुऔषध अफिम र घरेलु हतियार बरामद गरेको छ। धादिङको दक्षिणी क्षेत्र बेनीघाट रोराङ गाउँपालिका–२, होवाङमा सञ्चालन गरिएको विशेष प्रहरी अपरेशनका क्रममा ५१ किलो ९ सय ८० ग्राम अफिमसहित तीनजना पक्राउ परेका हुन्।
जिल्ला प्रहरी कार्यालय धादिङका अनुसार फरार प्रतिवादीको खोजीका क्रममा उक्त क्षेत्रमा लागूऔषध कारोबार भइरहेको गोप्य सूचना प्राप्त भएपछि इलाका प्रहरी कार्यालय गजुरीबाट प्रहरी नायब उपरीक्षक सुरज कार्कीको नेतृत्वमा टोली परिचालन गरिएको थियो। प्रहरी टोलीले स्थानीय ३५ वर्षीय वीरबहादुर तामाङको घर तथा गोठमा खानतलासी गर्दा ठूलो परिमाणमा अफिम फेला परेको हो।
प्रहरीले तामाङको सुत्ने कोठा नजिक पाँचवटा प्लास्टिकका बाल्टीमा लुकाइ राखिएको अवस्थामा कालो लेदो पदार्थ बरामद गरेको जनाएको छ। जिल्ला प्रहरी कार्यालय धादिङका सूचना अधिकारी डीएसपी प्रकाश दाहालका अनुसार पक्राउ परेका वीरबहादुर तामाङ यसअघि पनि लागूऔषध गाँजा मुद्दामा संलग्न थिए। २०७५ मंसिर २८ गते उनको घरबाट ३०० किलो गाँजा र एक थान भरुवा बन्दुक बरामद भएको थियो। त्यसयता फरार रहेका उनलाई प्रहरीले पुनः पक्राउ गर्न सफल भएको हो।
खानतलासीकै क्रममा बाख्रा बाँध्ने गोठभित्र लुकाइएको ४ फिट ६ इन्च लामो एक थान भरुवा बन्दुक र दुई थान डिजिटल तराजु समेत फेला परेको प्रहरीले जनाएको छ। पक्राउ परेका वीरबहादुर तामाङ यसअघि पनि लागूऔषध मुद्दामा संलग्न रही फरार रहेका प्रतिवादी भएको प्रहरीको भनाइ छ। उनलाई बरामद अफिम र हतियारसहित इलाका प्रहरी कार्यालय गजुरीमा राखी लागूऔषध तथा अवैध हातहतियार खरखजाना सम्बन्धी मुद्दामा अनुसन्धान अघि बढाइएको छ। जिल्ला अदालत धादिङबाट म्याद थप गरी थप अनुसन्धान भइरहेको प्रहरीले जनाएको छ।
यसैबीच, सोही क्षेत्रबाट थप दुई थान भरुवा बन्दुकसहित २८ वर्षीय विराज तामाङ र सानोकान्छा तामाङलाई पनि पक्राउ गरिएको छ। दुबै जनालाई आ–आफ्नै घरबाट नियन्त्रणमा लिइएको प्रहरीको भनाइ छ। धादिङको ग्रामीण क्षेत्रमा लागूऔषध र अवैध हतियारको सञ्जाल सक्रिय रहेको आशंकाबीच प्रहरीले निगरानी र खोजी अभियानलाई थप तीव्र बनाएको जनाएको छ।
प्रतिक्रिया दिनुहोस !
