विराटनगर : मोरङको कटहरी गाउँपालिका–१ महेशपुरमा बिहीबार तीनजना सवार मोटरसाइकल दुर्घटना हुँदा चालकको मृत्यु भएको छ । प्रहरीका अनुसार पूर्वबाट पश्चिमतर्फ आउँदै गरेको प्रदेश १–०४–००२ प ०४६४ नम्बरको मोटरसाइकल अनियन्त्रित भएर राति १ बजेतिर दुर्घटनामा परेको थियो ।
तीव्र गतिको मोटरसाइकल बिजुलीको पोलमा ठोक्किँदा तीनजना घाइते भएका थिए । घाइतेमध्ये मोटरसाइकल चालक विराटनगर महानगरपालिका–६ का ३५ वर्षीय हरिओम राजवंशीको मृत्यु भएको मोरङ ट्राफिक प्रमुख इन्स्पेक्टर राजन लम्सालले जानकारी दिए ।
उनका अनुसार दुर्घटनामा परेर गम्भीर घाइते हरिओमलाई उपचारका लागि विराटनगरको कोशी अस्पताल पुर्याउनसाथ चिकित्सकले मृत घोषित गरेका हुन् । दुर्घटनामा मोटरसाइकलको पछाडि सवार विराटनगर–६ का ३४ वर्षीय सन्दीप राजवंशी र ३३ वर्षीय वसन्त राजवंशी घाइते भएका छन् । मध्यम अवस्थाका घाइते दुवैजनालाई कोशीबाट थप उपचारका लागि विराट नर्सिङ होम रेफर गरिएको छ ।
ट्राफिक नियम उल्लंघन गर्दै तीनजना चढेर कुदाइएको मोटरसाइकल तीव्र गतिका कारण दुर्घटनामा परेको प्रहरीको प्रारम्भिक अनुसन्धानबाट खुलेको छ । दुर्घटनाग्रस्त मोटरसाइकल नियन्त्रणमा लिएर प्रहरीले थप अनुसन्धान गरिरहेको छ ।
प्रतिक्रिया दिनुहोस !
