इरानमाथि अमेरिकाको पुनः शक्तिशाली हमला, तेहरानद्वारा ‘होर्मुज’ बन्द गरेको घोषणा

वासिङ्टन : अमेरिकी सेनाले इरानभित्र रहेका सैन्य ठेगानाहरूमाथि लगातार दोस्रो दिन पनि शक्तिशाली हवाई आक्रमण गरेपछि मध्यपूर्वमा युद्धको संकट गहिरो भएको छ । अमेरिकी हमलाको जवाफमा इरानले विश्वकै सबैभन्दा संवेदनशील व्यापारिक जलमार्ग ‘स्ट्रेट अफ होर्मुज ’ मा व्यावसायिक जहाजहरूलाई निशाना बनाउनुका साथै सो जलमार्ग पूर्ण रूपमा बन्द गरेको घोषणा गरेको छ।

अमेरिकी राष्ट्रपति डोनाल्ड ट्रम्पले इरानमाथि ‘अझ कडा’ आक्रमण गर्ने चेतावनी दिँदै तेहरानले शान्ति सम्झौताका लागि ‘धेरै ढिलो गरिसकेको’ बताएसँगै यो नयाँ सैन्य टकराव सुरु भएको हो । अमेरिकी सेन्ट्रल कमान्डका अनुसार बुधबार इरानको ‘बेवजह र लगातार जारी आक्रामक गतिविधिको जवाफ’ मा आत्मरक्षाका लागि नयाँ हमलाहरू सुरु गरिएको हो। अमेरिकी रक्षा मन्त्रालयले यो कारबाही इरानी सेनाको सैन्य क्षमतालाई कमजोर बनाउन गरिएको बताएको छ।

अमेरिकी आक्रमणलगत्तै इरानको सरकारी मिडिया र ‘इस्लामिक रिभोल्युसनरी गार्ड्स कर्प्स’ले स्ट्रेट अफ होर्मुजमा दुईवटा जहाजमाथि सफलतापूर्वक प्रहार गरिएको दाबी गरेको छ। इरानी सेनाले सो जलमार्ग अब हरेक प्रकारका जहाजका लागि पूर्ण रूपमा बन्द गरिएको घोषणा गरेको छ। यद्यपि, अमेरिकी सेन्ट्रल कमान्डले भने व्यावसायिक जहाजहरू अझै पनि स्ट्रेट अफ होर्मुजबाट आवतजावत गरिरहेको दाबी गरेको छ।

इरानी सञ्चारमाध्यमहरूका अनुसार देशको दक्षिणी भाग तथा फारसको खाडीमा अवस्थित रणनीतिक क्युशम टापु, बन्दर अब्बास र सिरिक लगायतका सहरहरूमा ठूला विस्फोटका आवाजहरू सुनिएका छन्। यसअघि गत अप्रिलमा भएको एउटा नाजुक युद्धविराम पनि यो नयाँ सैन्य टकरावसँगै पूर्ण रूपमा भङ्ग भएको संकेतहरू देखिएका छन्।