सङ्खवासभा : सङ्खुवासभाको तुम्लिङ्टारबाट धनकुटाको हिलेतर्फ जाँदै गरेको बोलेरो जिप अरुण नदीमा खस्दा ३ जना घाइते भएका छन्।
आज दिउँसो साढे २ बजे दुर्घटना हुँदा मकालु गाउँपालिका–५ का चालक २० वर्षीय किरण गुरुङ, खाँदबारी–९ का ४१ वर्षीय रमेश राई र पैदलयात्री चैनपुर नगरपालिका–११ का ६६ वर्षीय ढोकरबहादुर पाण्डे घाइते भएको जिल्ला प्रहरीका डीएसपी दक्षकुमार बस्नेतले बताए।
प्रदेश १–०२–००२च४१०३ नम्बरको गाडी दुर्घटना घाइते भएकाहरूको खाँदबारी नगरपालिका ९ मा रहेको मनकामना अस्पतालमा उपचार भइरहेका डीएसपी बस्नेतले बताए। धर्मदेवी नगरपालिका–८ सुर्तीवारीमा पैदलयात्री पाण्डेलाई ठक्कर दिएर गाडी अनियन्त्रित भएको खुलेको छ। घाइते मध्ये दुई जनाको अवस्था गम्भीर रहेको र एकजना सामान्य घाइते भएको प्रहरीले जनाएको छ।
दुर्घटना भएको जिप अरुण नदीमा डुबेको र झिक्न सक्ने अवस्था नरहेको डीएसपी बस्नेतले बताए। घटनास्थलमा नेपाल प्रहरी र सशस्त्र प्रहरी परिचालन गरिएको छ। घटनाको थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
