झापा : भद्रपुर नगरपालिकाले प्रादेशिक अस्पताल (मेची अस्पताल)लाई शिक्षण अस्पताल बनाउन कोशी सरकारसमक्ष माग गरेको छ । मंगलबार दिउँसो प्रादेशिक अस्पतालको स्थलगत निरीक्षण भ्रमणमा आएका कोशी प्रदेशका स्वास्थ्य मन्त्री प्रदीपकुमार सुनुवारलाई भेटेर भद्रपुर नगरपालिकाका प्रमुख गणेश पोखरेलले ज्ञापन पत्र बुझाउँदै शिक्षण अस्पतालको रुपमा स्थापना गर्न माग गरेका हुन् ।
ज्ञापनपत्रमा भनिएको छ, 'भद्रपुर–८ स्थित प्रदेश सरकार मातहत सञ्चालनमा रहेको यो एक मात्र प्रादेशिक अस्पताल हो । यो अस्पताल यस क्षेत्रको सबैभन्दा पुरानो र गुणस्तरीय स्वास्थ्य सेवा प्रवाह गरी विश्वसनीयता कायम गर्दै आएको छ । बिरामीको चाप सङ्ख्या दिनानुदिन बढ्दै गएको छ । यस अस्पतालमा ताप्लेजुङ, पाँचथर, इलाम लगायत भारतबाट समेत बिरामीहरू सेवा लिन आउने गरेका छन् ।'
ज्ञापनपत्रमा स्वास्थ्य सेवामा नागरिकको सहज पहुँच बनाउन र स्वास्थ्य क्षेत्रमा दक्ष जनशक्ति उत्पादन गर्न कोशी प्रदेशकै एक मात्र अस्पतालको रुपमा रहेको प्रादेशिक अस्पताललाई शिक्षण अस्पतालको रुपमा स्थापना गर्न गर्दै ,'गुणस्तरीय स्वास्थ्य सेवा पाउने नागरिकको मौलिक हकको प्रत्याभूति गर्नसमेत यस प्रादेशिक अस्पतालमा स्वास्थ्य सेवा सुविधा, जनशक्ति थप गर्ने, भवनको व्यवस्था गर्ने कार्य स्वास्थ्य मन्त्रालयबाट हुन अत्यावश्यक देखिएको ' उल्लेख गरेको छ।
प्रतिक्रिया दिनुहोस !
