कुश्मा : पर्वत जिल्लामा प्रतिनिधिसभा तथा प्रदेशसभाको निर्वाचनको मतगणना जारी छ।
पर्वतमा खसेको ६६ हजार २ सय ७३ मतमध्ये अपराह्न ४ बजेसम्म प्रतिनिधिसभाको प्रत्यक्षतर्फ झण्डै १७ हजार मतगणना गरिएको छ।
जसअनुसार गठबन्धन तर्फका कांग्रेसका उम्मेदवार अर्जुनप्रसाद जोशीले नेकपा एमालेका उम्मेदवार पदम गिरीलाई ६ सय ९८ मतान्तरले पछि पारेका छन्।
जोशीले ८ हजार ४२ मत प्राप्त गरेका छन् भने गिरीले ७ हजार ३ सय ४४ मत प्राप्त गरेका छन्। त्यस्तै प्रदेश सभा सदस्य क्षेत्र नं. १ तर्फ गठबन्धन तर्फका माओवादी केन्द्रका उम्मेदवार सुदिप कुँवरले ७ हजार ८ सय ६४ मत प्राप्त गरेका छन् भने एमालेका भक्त कुँवरले ७ हजार ५ सय ९१ मत प्राप्त गरेका छन्।
प्रदेश सभा निर्वाचन क्षेत्र नं. २ तर्फ गठबन्धनको तर्फका कांग्रेस उम्मेदवार ऋषिकेश तिवारीलाई एमालेका उम्मेदवार मित्रलाल बस्यालले १ हजार ५ सय ५० मतले पछि पार्दै अग्रता कायम राखेका छन्। पछिल्लो परिणाम अनुसार कांग्रेसका तिवारीले ५ हजार ८ सय २३ र एमालेका बस्यालले ७ हजार ३ सय ७३ मत प्राप्त गरेका छन्।
मुख्य निर्वाचन अधिकृतको कार्यालय पर्वतले दिएको जानकारी अनुसार मतगणना कार्य तीव्र रूपमा अघि बढिरहेको र बुधबार बेलुकासम्म अन्तिम परिणाम आउन सक्ने जानकारी दिएको छ।
प्रतिक्रिया दिनुहोस !
