रुकुम पूर्व : शनिबार सम्पन्न छापामार अथवा गुरिल्ला रेस प्रतियोगितामा ५२ किलोमिटरतर्फ रुकुम पश्चिमको सानीभेरी गाउँपालिका-३ का भुवन ओली प्रथम भएका छन्।
जिल्लाको भूमे गाउँपालिकाले द्वन्द्वको सम्झना स्वरुप सञ्चालन गरेको प्रतियोगितामा ओलीले ६ घण्टा ८ मिनेट ९ सेकेण्डमा दूरी पार गरेर उपाधि जितेका हुन्। सोही स्थानका अर्जुनकुमार बस्नेतले ६ घण्टा ८ मिनेट १९ सेकेण्डमा दूरी पार गरेर दोस्रो बने।
भूमे-३ का शक्तिराम रोका ६ घण्टा १५ मिनेटमा पार गर्दै तेस्रो र ६ घण्टा २३ मिनेट १ सेकेण्डमा दौड पूरा गर्दै थवाङ १ रोल्पाका मनकुमार रोकामगर चौंथो बने।
महिलातर्फ भने सोलुखुम्बुकी अनिता राई विजेता बनिन्। उनले ९ घण्टा १० मिनेट ३ सेकेण्डमा दूरी पार गरेकी थिइन्।
९ घण्टा १० मिनेट ३ सेकेण्डमा दुरी पार गर्दै भूमे गाउँपालिका-८ की सोनिका खड्का द्वितीय र १० घण्टा १५ मिनेट २ सकेण्डमा दूरी पार गर्दै भूमे ६ की अनिता बुढामगर तृतीय भइन्।
महिला र पुरुष तर्फको पुरस्कार समान रहेको छ। विजेताले ५० हजार, उपविजेताले ३० हजार, तेस्रोले १५ हजार र चौंथो स्थान हासिल गर्नेले ८ हजार नगद पुरस्कार पाएका छन्। पाँचौंदेखि दशौं स्थानसम्म हाँसिल गर्ने धावकले समान ५ हजार नगद पुरस्कार पाएका छन्।
यसैगरी १० किलोमिटरमा पुरुष तर्फ भूमे-२ जंगाधाराका आकाश रोका मगर र महिला तर्फ भूमे-२ खाबाङका प्रिया पुन मगर प्रथम भएका छन्। आकाशले १ घण्टा १२ मिनेटमा र प्रियाले १ घण्टा ४३ मिनेटमा दूरी पार गरे।
यसमा प्रथमले १० हजार, द्वितीयले ७ हजार ५ सय, तृतीयले ५ हजार र सान्त्वना हुनेले २ हजार ५ सय रुपियाँ सहित मेडल, प्रमाणपत्र पाएका छन्। पाँचौँदेखि दशौं स्थान हासिल गर्ने प्रतियोगीले प्रतिव्यक्ति १/१ हजार नगदसहित प्रमाणपत्र पाएका छन् ।
तत्कालीन माओवादी आन्दोलनका बेला पूर्वी रुकुम र रोल्पा अन्तर्गतका पदमार्गमा सोही आन्दोलनका लडाकुहरुले प्रयोग गरेको बाटोमा द्वन्द्वको सम्झना स्वरुप प्रतियोगिता सञ्चालन गरिएको हो।
सशस्त्र युद्ध ताका तत्कालीन माओवादीले सिस्ने जलजला (सिज) अभियान सञ्चालन गरेको थियो।
प्रतिक्रिया दिनुहोस !
