पानीमा चुहिएको करेण्ट लागेर चार जना घाइते

बर्दिया : बर्दियाको गुलरिया नगरपालिका वार्ड नम्वर ७ मा पानीमा चुहिएको करेन्ट लागेर चार जना घाइते भएका छन् । जिल्ला कृषि विकास कार्यालय पछाडी खेतमा धानको व्याड छर्न तयार गरेको पानीमा विद्युतीय करेण्ट चुहिँदा खेत जोती रहेका किसान सहित ४ जना घाइते भएका छन् भने एउटा गोरु मरेको छ ।

खेतमै गाडिएको विद्युतीय पोल अडाउन बाँधिएको तारबाट करेण्ट पानीमा चुहिएपछि गुलरिया नगरपालिका वार्ड नं. ८ निवासी ५५ बर्षीय जलील धोवी र उहालाई जोगाउन गएका श्रीमान श्रीमती मुजफ्फर अली, हजरा वानो र इन्ताज मनिहार घाइते हुनुभएको हो ।

धानको बिउ छर्न खेत जोतिरहेका किसान जलीलको एउटा गोरु घटना स्थलमै मरेको छ भने अर्को गोरु घाइते भएको उहाँले बताउनुभयो ।
अव्यवस्थित तथा असुरक्षित तरिकाले खेत बारीमा पोल गाडिँदा घटना भएको स्थानीयको आरोप छ ।

घटना पछि विद्युत प्राधिकरण गुलरिया शाखाका मर्मत टोलीले उक्त विद्युतीय लाइन मर्मत गरेका छन् । घटनाको बारेमा अनुसन्धान भैरहेको प्रहरीले जनाएको छ । घाइतेको अवस्था सामान्य रहेको जनाइएको छ ।

बर्षातको समयमा विद्युतीय पोल तथा तारहरु देखेपछि सावधानी अपनाउनु पर्ने विद्युत प्राधिकरण शाखा गुलरियाले सचेत बनाएको छ ।