ट्रम्पको निर्णयलाई अदालतको चुनौति

वासिङटनः अमेरिकाका राष्ट्रपति डोनाल्ड ट्रम्पले मुस्लिम बहुल सात देशका नागरिकलाई लगाइएको आदेशलाई अमेरिकाको एक अदालतले रोक्न आदेश दिएको छ । न्युयोर्कस्थित जिल्ला न्यायाधीश एन डोनलेले यस्तो आदेश दिएका हुन् ।

अमेरिकन सिभिल लिबर्टिज युनियन (एसिएलयु) ले ट्रम्पको आदेशविरुद्ध मुदा दर्ता गरेको थियो । जोन एफ केनेडी अन्तर्राष्ट्रिय विमानस्थलमा दुईजना इराकी पुरुषलाई हिरासतमा लिइएपछि एसिएलयुले मुद्दा दर्ता गरेको थियो । ट्रम्पको आदेश लागू भएलगत्तै अमेरिकाका ठूला विमानस्थलमा विरोध प्रदर्शन सुरु भएका छन् ।

न्यायाधीश डोनले आदेश दिँदै भने, ‘अमेरिकी शरणार्थी प्रवेश कार्यक्रमअन्तर्गत स्वीकृति दिइसकेका व्यक्तिलाई रोक्न मिल्दैन । वैध रूपमा कागजात भएका इराक, सिरिया, इरान, सुडान, लिबिया, सोमालिया र यमनका नागरिकलाई यस्तो प्रतिबन्ध लगाउन मिल्दैन ।'

उनले सरकारको आदेशपछि अमेरिकी विमानस्थलमा हिरासतमा लिइएका सबै व्यक्तिको सूची उपलब्ध गराउन आदेश दिएका छन् । ट्रम्पको आदेशपछि फिर्ता गरिएका नागरिकलाई ठूलो र अपूरणीय क्षति हुनसक्ने उनले आशंका गरे ।

अदालतका तर्फबाट जारी गरिएको सूचनामा अमेरिकी सिमानामा कार्यरत संस्थालाई वैध भिसा भएका इराक, सिरिया, इरान, सुडान, लिबिया, सोमालिया र यमनबाट अमेरिका प्रवेश गरेका व्यक्तिलाई निकाल्न नहुने स्पष्ट आदेश दिइएको छ ।

ट्रम्पको आदेशपछि अमेरिकी विमानस्थलमा हिरासतमा लिइएका व्यक्तिका परिवारका सदस्य तनाव र खिन्न देखिन्थे । आफन्त कतिखेर मुक्त हुन्छन् भनेर विमानस्थलमा उनीहरू चिन्तित देखिन्थे । सम्बन्धित देशमा फिर्ता गरिने हो वा अमेरिका प्रवेशमा अनुमति दिइने हो भनेर उनीहरू अन्योलग्रस्त देखिएका छन् ।

२५ वर्षीय योसरे घालेद आफ्नी ६७ वर्षीया सानिमा सासूलाई पर्खिएका थिए । उनी साउदी अरबबाट आएको विमानबाट आएकी थिइन् । उनी हिरासतमा राखिएकी छन् । मुटुरोगकी विरामी उनी यमनी नागरिक हुन् ।

अमेरिकाले रोकेका आप्रवासीलाई क्यानडाले स्वागत गर्ने क्यानडाका प्रधानमन्त्री जस्टिन त्रुदेउले अमेरिकाले बन्देज गरेका विदेशी शरणार्थी तथा आप्रवासीलाई क्यानडाले स्वागत गर्ने बताएका छन् ।

ट्विटरमार्फत उनले भने, ‘जसले हिंसा, आतंक र युद्ध भोगिरहेको छ । ती सबैलाई क्यानडाले स्वागत गर्न चाहन्छ ।' त्रुदेउले उनीहरूलाई धर्मको आधारमा कुनै पक्षपात नगर्ने पनि स्पष्ट परेका छन् । ‘विविधता हाम्रो शक्ति हो, क्यानडामा स्वागत छ', उनले ट्विटमा लेखेका छन् । ट्रम्पले मुस्लिम समुदायका आप्रवासी तथा शरणार्थीलाई अमेरिका प्रवेशमा कडाइ गर्ने कार्यकारी आदेशमा हस्ताक्षर गरेपछि त्रुदेउको यस्तो भनाइ आएको हो ।

ले तीन देशका नेतासँग वार्ता गर्ने

अमेरिकाका राष्ट्रपति डोनाल्ड ट्रम्पले साउदी अरब र संयुक्त अरब इमिरेट्सका नेतासँग मुिस्लम आप्रवासीलाई अमेरिका प्रवेशमा रोक लगाइएको बारेमा टेलिफोन वार्ता गरेका छन् । केही देशका मुस्लिमलाई रोक लगाइएको विषयमा विश्वभरी होहल्ला हुन थालेपछि उनले रोक नलगाइएका मुस्लिम देशका नेतासँग आइतबार कुराकानी गरेका हुन् ।

सबैसँग केही देशका आप्रवासी तथा शरणार्थीलाई अमेरिका प्रवेशमा रोक लगाउनुको कारण र यसले पार्ने असरका बारेमा छलफल हुने जनाइएको छ । अमेरिकाले प्रवेशमा रोक लगाएका देशमा साउदी अरब र अरब इमिरेट्स कुनै देश पर्दैनन् । ट्रम्पले इरान, इराक, लिबिया, सोमालिया, सुडान, सिरिया र यमनका नागरिकलाई अमेरिका प्रवेशमा रोक लगाएको हो ।

ट्रम्प र पुटिनबीच लामो वार्ता
अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीच केही महत्वपूर्ण विषयमा घण्टौं लामो टेलिफोन वार्ता भएको छ ।

दुबै देशका राष्ट्र प्रमुखबीच भएको वार्ताका धेरै विषयवस्तुमध्ये प्रमुख दुईवटा मुद्दा– पूर्वराष्ट्रपति बाराक ओबामाले पहिलेदेखि रूसमाथि लगाएका विभिन्न खाले प्रतिबन्धका भविष्यबारे प्रश्न र आतंककारी इस्लामिक स्टेट (आइएस) समूहलाई परास्त गर्न दुबै देशबीच सैनिक सहयोग प्रवर्धन गर्ने मार्ग पहिल्याउनुलगायत अन्य विषय पनि परेका छन् ।

ह्वाइट हाउसले दुई समकक्षीबीच गहिरो वार्ता भएको औपचारिक पुष्टि गरे पनि कुन कुन विषयमा वार्ता भए भन्ने विस्तृत खुलासा गरेको छैन । केही समयअघि देखिएको अमेरिका र रूसबीचको तनावपूर्ण सम्बन्धमा यस वार्ताले महत्वपूर्ण सुरुवात गरेको भन्दै ह्वाइट हाउसले यसबारे विज्ञप्ति प्रकाशन गरी जानकारीसम्म दिएको छ ।

दुई उच्चस्तरीय नेताबीच चलेको सो वार्तामा दुबै देशको संयुक्त दुस्मनको रूपमा खडा रहेको आइएस समूहलाई निष्प्रभावी र परास्त गरी सिरियासहित सम्पूर्ण विश्वमा स्थायी शान्तिको उपलब्धिका लागि द्विपक्षीय सैनिक सहयोगलगायत अन्य विषयमा छलफल भएको जनाइएको छ ।

वार्ताका क्रममा दुबै राष्ट्रपतिले यस मामिलामा आतंकवादविरुद्धको युद्धमा गठबन्धनका साझेदारका रूपमा सहकार्य गर्ने समझदारी गरेको बताइन्छ ।

रूसी राष्ट्रपतिको कार्यालय क्रेमलिनले भने रूस र अमेरिकाबीच सुस्त गतिमा चलिरहेको व्यापार, वाणिज्य र आर्थिक गतिविधिमा सुधार र प्रवद्र्धन एवं दुबै देशका व्यापारिक वृत्तमा सशक्तिकरण सम्बन्धमा वार्ता भएको जनाएको छ ।

यसअतिरिक्त आतंकवादविरुद्धको युद्धमा दुबै देशको सहकार्य, अरब–इजरायलबीचको मनमुटाव र आपसी द्वन्द्व, इरानको आणविक हतियार उत्पादन तथा भण्डारण योजना, कोरियाली प्रायद्वीपको तनाव, युक्रेनको संकटजस्ता अन्तर्राष्ट्रिय मामिलाका जल्दाबल्दा बिषयमा दुई उच्चस्तरीय नेताहरूबीच छलफल भएको भनी क्रेमलिनले जनाएको छ ।