‘शक्तिशाली भारत चीनका लागि खतरा हुँदैन्'

नयाँदिल्लीः भारतले आफ्नो उदयले चीनलाई कुनै पनि नोक्सान र चुनौती नहुने जानकारी दिएको छ । भारतले चीनसँग आपसी सम्प्रभुताको सम्मान गर्नुपर्नेमा जोड दिएको छ ।

दोस्रो रायसीना डायलगलाई सम्बोधन गर्दै भारतका विदेशसचिव एस जयशंकरले बुधबार भारतको यस्तो धारणा सार्वजनिक गरेका हुन् । उनले चीन-पाकिस्तान आर्थिक करिडोर परियोजनको भने विरोध गरेका छन् । उनले उक्त आर्थिक योजनाबाट भारत असन्तुष्ट भएको खुलासा गरेका छन् । उक्त आर्थिक करिडोर पाकिस्तान प्रशासित कश्मीर हुँदै ग्वादर पुग्छ ।

जयशंकरले कश्मीर जस्तो क्षेत्रमा विशेष आर्थिक करिडोर बनाउन नहुने बताएका छन् । यसबाट चीनले भारतको सम्प्रभुताको ख्याल नगरेको दाबी गरे । जयशंकरले भने, ‘पाकिस्तान-चीन आर्थिक करिडोर पाकिस्तान प्रशासित कश्मीर हुँदै गएको छ । त्यो क्षेत्र भारतको हो । पाकिस्तानले कश्मीरमा अवैध कब्जा जमाएर राखेको छ ।' जयशंकरले भारतसँग सल्लाह नगरेर नै चीनले यस्तो गर्नु चिन्ताजनक भएको खुलासा गरे । कश्मीरमा भएका घटनाप्रति भारत संवेदनशील र चिन्तित हुनु स्वभाविक भएको उनको भनाइ थियो ।

चीन र भारतबीच विगतमा केही अविश्वास भए पनि हाल त्यस्तो नभएको उनले स्पष्ट पारे । उनले सन् १९४५ पछि दुवै देशबीच सम्बन्धमा केही सुधार भएको स्मरण पनि गरे । जयशंकरले भने, ‘भारत शक्तिशाली भएर चीनलाई केही नोक्सान नहुने हामी सम्झाउन चाहन्छौं । यसैगरी चीनको उदयबाट भारतलाई पनि कुनै हानि हुनेछैन ।' केही समययता भारत र चीनबीच आतंकवादी मसुद अजहरमाथिको प्रतिबन्ध, एनएसजीमा भारतको प्रवेशजस्ता विषयमा केही समस्या उत्पन्न भएको छ ।

भारतीय विदेश सचिव जयशंकरले अन्तर्राष्ट्रिय सुरक्षाका लागि आतंकवाद गम्भीर चुनौती भएको बताएका छन् । कुनै कुनै विषयमा सामान्य मतभेद भए पनि व्यापारिक र नागरिक स्तरमा दुई देशबीच आपसी सम्बन्धमा सुधार भएको उनले बताए ।