रूसी सन्य हेलिकोप्टर ध्वस्त
मस्कोः रूसी सेनाको एक हेलिकोप्टर सोमबार विद्रोहीको आक्रमणबाट सिरियामा ध्वस्त भएको छ ।
इदलिब प्रान्तमा उडिरहेका बेला विमानमा आक्रमण भएको थियो । हेलिकोप्टरमा यात्रा गरिरहेका ५ जनाको मृत्यु भएको छ । रूसी रक्षा मन्त्रालयले विज्ञप्ति जारी गर्दै घटनाको पुष्टि गरेको छ ।
रक्षा मन्त्रालयले भनेको छ, ‘रूसी एमआई -८ सैन्य परिवहन हेलिकोप्टर सिरियामा खसालिएको छ । उक्त हेलिकोप्टर अलेप्पोमा मानवीय सहायता उपलब्ध गराएर फर्किरहेका बेला आक्रमण भएको थियो ।
' युद्धका कारण अलेप्पोमा लाखौं मानिस फसिरहेका छन् । त्यसरी फसेका व्यक्तिलाई बाँच्नका लागि अत्यावश्यक सामग्री रूसले उपलब्ध गराउने गरेको छ । उक्त आक्रमण कसले गरेको भन्ने जानकारी हुन सकेको छैन ।
हेलिकोप्टरमा चालक दलका ३ सदस्य र २ अधिकारीले यात्रा गरिरहेका थिए । क्रेमलिनका प्रवक्ता दिमित्री पेसकोभले मारिएका सैनिकप्रति समवेदना प्रकट गरेका छन् । उनले मानव बस्ती कम भएको ठाउँमा विमान झरेको बताए । इदलिब प्रान्तमा जिहादी ग्रुपको वर्चस्व रहेको छ । सामाजिक सञ्जालमा सार्वजनिक भएका तस्बिर र भिडियोमा जलेका लास देखिएका छन् ।
रूसले गत वर्षदेखि सिरियाका राष्ट्रपति बसर अल असदको सहायताका लागि विद्रोहीमाथि आक्रमण सुरु गरेको छ । अमेरिकी नेतृत्वका पश्चिमा शक्तिले भने रूसी सेनाले प्रजातन्त्र समर्थक नेतामाथि आक्रमण गरेको आरोप लगाउँदै आएका छन् ।
प्रतिक्रिया दिनुहोस !
