विपिन जोशीको रिहाइका लागि पहल गरिदिन राजा थानीसँग प्रधानमन्त्रीको आग्रह
![विपिन जोशीको रिहाइका लागि पहल गरिदिन राजा थानीसँग प्रधानमन्त्रीको आग्रह](https://annapurnapost.prixacdn.net/media/albums/amir-and-prachanda_t13v28oiiA_vvcCgX2XpJ.jpg)
काठमाडौं : प्रधानमन्त्री पुष्पकमल दाहालले इजरायलमा हमासको आक्रमणमा परी बेपत्ता भएका नेपाली विद्यार्थी विपिन जोशीको सकुशल रिहाइका लागि पहल गरिदिन आग्रह गरेका छन्।
मित्रराष्ट्र कतारका अमिर शेख तामिम बिन हमाद अल थानीसंग बुधबार भएको ‘द्विपक्षीय वार्ता’ का क्रममा प्रचण्डले विपिन जोशीको शीघ्र तथा सुरक्षित रिहाइको सहजीकरणका लागि कतार सरकार समक्ष पुनः अनुरोध गर्न आग्रह गरे।
आफ्नो शैक्षिक प्रयोगात्मक परीक्षाका लागि इजरायलमा रहेका निर्दोष नेपाली विद्यार्थी विपिन जोशी गत अक्टोबर ७ मा इजरायलमा हमासले गरेको आक्रमणपश्चात् बेपत्ता छन्।
त्यस्तै प्रधानमन्त्री दाहालले नेपाल र कतारबीच रहिआएको आपसी सम्बन्धलाई थप सुदृढ तुल्याउँदै दुवै देशको हितमा सहयोग आदानप्रदान हुनुपर्ने बताए। कतारमा कार्यरत नेपालीहरू नेपाल-कतारबीच रहिआएको मैत्रीसम्बन्धलाई अझ सबल बनाउने सूत्र भएको उल्लेख गर्दै प्रधानमन्त्री दाहालले आगामी दिनमा यस्ता सम्बन्धलाई अझ मजबुद बनाउनुपर्नेमा जोड दिए।
नेपाल र कतारबीच सदैव सौहार्द सम्बन्ध रहँदै आएको उल्लेख गर्दै प्रधानमन्त्री दाहालले दुई देशबीच सम्बन्धहरू सौहार्दपूर्ण मित्रता, आपसी सम्मान, विश्वास र सहयोगमा आधारित रहेको बताए। सो क्रममा प्रधानमन्त्री दाहालले कतार सरकारलाई लुम्बिनी तथा पोखराबाट समेत उडान सञ्चालन गर्न आग्रह गरे।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)