झापामा ब्राउन सुगरसहित दुई जना पक्राउ
![झापामा ब्राउन सुगरसहित दुई जना पक्राउ](https://annapurnapost.prixacdn.net/media/albums/arrested_20180911053149_QZgHCL6VQb_2XgQVAaYCs.jpg)
झापा : सशस्त्र प्रहरीले झापा गाउँपालिकाबाट फेरि ६३.५९ ग्राम ब्राउन सुगरसहित दुई जनालाई पक्राउ गरेको छ । झापा गाउँपालिका– ७ का २५ वर्षीय सुनिराम हेमरन र सोही ठाउँका २१ वर्षीय हिरण राजवंशीलाई पक्राउ परेको सशस्त्र प्रहरी बल, नेपाल नम्बर २ गण हेडक्वाटर झापाका डीएसपी तथा सूचना अधिकारी दिनेश कटुवालले जानकारी दिए ।
सशस्त्रले सात घण्टाको अन्तरालमा त्यहाँबाट १०० ग्राम बढी ब्राउन सुगरसहित तीन जनालाई पक्राउ गरिसकेको छ । झापा गाउँपालिका–४ लसुनामा सशस्त्र प्रहरी बल, नेपाल बोर्डर आउट पोस्ट टाघनडुब्बाबाट खटिएको चेक प्वाइन्ट टोलीले गए राति ८ बजेको समयमा पैदल आउँदै गरेका उनीहरूलाई शंका लागि चेकजाँच गर्दा हेमरनले किराना सामान बोकेको झोलाबाट ६३ दशमलव ५९ ग्राम ब्राउन सुगर फेला परेको सूचना अधिकारी कटुवालले बताए ।
सशस्त्रले ब्राउन सुगरसहित पक्राउ गरेका दुवै जनालाई आवश्यक कारबाहीका लागि इलाका प्रहरी कार्यालय कुमरखोद बुझाइसकेको छ । सशस्त्रका बिओपी टाघनडुब्बाबाट खटिएको टोलीले झापा–१ सितुमारीबाट शुक्रबार दिउँसो १ बजेको समयमा बीआर ३७ एन ५८११ नम्बरको भारतीय मोटरसाइकलमा सवार २३ वर्षीय राहुल मण्डललाई शंका लागेर चेकजाँच गर्दा ४८ दशमलव ५५० ग्राम ब्राउन सुगर बरामद गरेको थियो । पक्राउ परेका मण्डल भारत किशनगञ्ज जिल्ला धनतोला ग्राम पञ्चायत बालुवाडीका बासिन्दा हुन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)