८ लाख मूल्य बराबरको तस्करीको सामान बरामद, चारजना पक्राउ
![८ लाख मूल्य बराबरको तस्करीको सामान बरामद, चारजना पक्राउ](https://annapurnapost.prixacdn.net/media/albums/taskari-ko-saman-1_Omwnpjpun2_hFRw39rJZR.jpg)
धनगढी : सशस्त्र प्रहरी सीमा सुरक्षा बलले भारतबाट तस्करी गरि ल्याएको ठूलो परिमाणमा सामानसहित चारजना पक्राउ गरेको छ । सशस्त्र प्रहरी बल,नेपाल प्रस्तावित सीमा सुरक्षा गुल्म त्रिनगरको टोलीले बुधबार झण्डै ८ लाख बराबरको सामान र तस्करीमा संलग्न भएको आरोपमा चारजना महिला पक्राउ परेका हुन्।
सशस्त्र प्रहरी नायब उपरीक्षक बिलबहादुर फोजुको कमाण्डमा खटिएको टोलीले विशेष सुराकीको आधारमा भारतबाट अवैध रुपमा भन्सार छली नेपालतर्फ ल्याउँदै गरेको ७ लाख ९८ हजार मुल्य बराबरको सामान बरामद गरेको हो ।
प्रहरीले लेडिज सुट १७२ थान, धोती साडी १३२ थान,क्यापासिटर ५० थान,कुलर पम्प ६ थानसहित विभिन्न मोटरपार्टस,विद्युतका सामान बरामद गरेको हो। सशस्त्र प्रहरीले उक्त सामानको ७ लाख ९८ हजार मुल्यांकन गरेर कैलाली भन्सार कार्यालय बुझाएको छ ।
सशस्त्र प्रहरीले उक्त सामान तस्करीमा संलग्न भएको आरोपमा धनगढी उपमहानगरपालिका- २ का महेश्वरी बिष्ट,तुलसी भट्ट,धना साउद र गौरी ओझालाई पक्राउ गरेको छ ।
सशस्त्र प्रहरीले फागुन ६ गते यता मात्र १८ लाख ५६ हजार बराबरको सामान पक्राउ गरी भन्सार बुझाएको र १ लाख ३७ हजार मुल्य बराबरको कुखुरा र माछा बरामद गरी नष्ट गरेको जनाएको छ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)