मुलुकको अर्थतन्त्र लयमा फर्किन थालेपनि चुनौतिमुक्त हुन सकेको छैन : अर्थमन्त्री

काठमाडौं : आर्थिक वर्ष २०८१/०८२ को बजेटका सिद्धान्त र प्राथमिकता प्रतिनिधिसभा बैठकमा प्रस्तुत भएको छ। अर्थमन्त्री डा.प्रकाशशरण महतले बैठकमा बजेटका सिद्धान्त र प्राथमिकतामाथि छलफल गरियोस् भनी प्रस्ताव पेश गरेका हुन्।

उनले बजेटको सिद्धान्त र प्राथमिकता प्रस्तुत गर्दै मुलुकको अर्थतन्त्र क्रमश सकारात्मक दिशातर्फ उन्मुख भइरहेको दावी  गरे । अर्थमन्त्री महतले विद्युत उत्पादनमा र पर्यटन आवागमन संख्यामा वृद्धि हुनुको साथै विदेशी लगानी बढ्नुले अर्थतन्त्रमा सकारात्मक योगदान पुगेको बताए।

बैंकिङ क्षेत्रमा पर्याप्त तरलता,ब्याजदर एकल बिन्दुतिर झर्ने क्रममा रहेको र निक्षेप कर्जा प्रवाहमा क्रमश वृद्धि भएको उनको भनाइ छ। घर जग्गा कारोबार र पुँजीबजार सुधार उन्मुख भइरहेको उनको भनाइ छ।

राजश्व संकलन लक्ष्यअनुसार नभएपनि वृद्धिदर करिब १० प्रतिशत रहेको र आउने दिनमा थप वृद्धि हुने विश्वास व्यक्त गरे। मन्त्री महतले मुलुकको अर्थतन्त्र लयमा फर्किन थालेपनि बाह्य र आन्तरिक समस्याका कारण चुनौतिमुक्त हुन नसकेको उल्लेख गरे।