विराटनगर : मोरङको पथरीशनिश्चरेमा सवारीसाधनको ठक्करबाट बुधबार साँझ एक जनाको मृत्यु भएको छ ।
यद्यपि, मृतकको पहिचान खुलेको छैन । ठक्कर दिने सवारीसाधन पनि फेला नपरेको प्रहरीले जनाएको छ । प्रहरीका अनुसार पूर्व–पश्चिम लोकमार्गअन्तर्गत पथरीशनिश्चरे नगरपालिका–१ मा नम्बर नखुलेको सवारीसाधनले साँझ ६:३० बजेतिर ठक्कर दिँदा अन्दाजी २२ वर्षीय युवकको मृत्यु भएको हो ।
घटनाको प्रकृति हेर्दा युवक दुर्घटनामा परेजस्तो देखिने मोरङ प्रहरीका प्रवक्ता डीएसपी रन्जनकुमार दाहालले जानकारी दिए । उनका अनुसार गम्भीर घाइते अवस्थामा सडकमा भेटिएका युवकलाई उपचारका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टर पु¥याइएको थियो । उपचारका क्रममा साँझ ७:४० बजेतिर चिकित्सकले मृत घोषित गरेका हुन् ।
मृतकको नाम, थर र वतन खुल्न नसकेको डीएसपी दाहालले बताए । ‘मृतकको पहिचान खुल्न बाँकी छ । शव ट्रमा सेन्टरमै राखिएको छ,’ उनले भने, ‘ठक्कर दिने सवारीसाधन पनि फेला परेको छैन । नम्बर प्लेटसमेत खुल्न बाँकी छ ।’ मृतकको पहिचानको प्रयास गर्दै दुर्घटना गराउने सवारीसाधनको खोजी तीव्र पारिएको उनको भनाइ छ ।
प्रहरीका अनुसार घटनाको प्रकृति हेर्दा तीव्र गतिको सवारीसाधनले ठक्कर दिँदा दुर्घटना भएजस्तो देखिन्छ । ठक्कर दिएर युवकलाई घाइते बनाएपछि उक्त सवारीसाधन फरार भएको हुनसक्ने प्रहरीको अनुमान छ ।
प्रतिक्रिया दिनुहोस !
