सडकमार्गबाट एकै सातामा करिब चार सय विदेशी पर्यटक सोलु भित्रिए
कात्तिक १७, २०८० शुक्रबार ११:२४:२६
सोलुखुम्बु : सडकमार्गबाट एकै हप्ता झण्डै चार सयजना विदेशी पर्यटक सोलुखुम्बु जिल्ला भित्रिएका छन् । पछिल्लो एक सातामा गाडीमार्फत् २४३ पुरुष र १०८ जना महिला गरी ३५१ जना विदेशी पर्यटक जिल्ला भित्रिएको ट्राफिक प्रहरी पोष्ट पत्तालेले जनाएको छ ।
सोही अवधिमा ५६ महिला र ६१ पुरुष गरी ११७ जना विदेशी पर्यटक स्थलमार्गको प्रयोग गरी बाहिरिएका छन् । पर्यटकीय सिजन भएकाले विदेशीहरु काठमाडौंबाट स्थलमार्गमार्फत् सल्लेरी हुँदै सगरमाथा क्षेत्र जाने क्रम बढिरहेको ट्राफिक प्रहरी जिवन बस्नेतले जानकारी दिए ।
कतिपय पर्यटक गाडी नै रिजर्भ गरेर आउने गरेको उनको भनाइ छ । सल्लेरीबाट थामडाँडासम्म सडक सवारी सञ्चालन भएसँगै काठमाडौंबाट स्थलमार्ग हुँदै सगरमाथा क्षेत्र भ्रमणमा पुग्ने विदेशीको संख्या बढिरहेका छन् ।
काठमाडौंबाट खुम्बु आउने पर्यटकहरुका लागि रामेछापको मन्थलीबाट लुक्ला उडान भइरहेका छन् । तर काठमाडौंबाट मन्थली र त्यहाँबाट लुक्ला जान झन्जट हुने भन्दै कतिपय पर्यटक सडकमार्गको प्रयोग गर्न रुचाउन थालेका छन् ।
मन्थलीबाट समयमा उडान नहुने र त्यहाँ उपयुक्त खान बस्नको समेत व्यवस्था नहुँदा पर्यटकलाई सास्ती हुने गरेको व्यवसायी बताउँछन् । काठमाडौंबाट गाडीमा आउने पर्यटकहरु एकैदिनमा सल्लेरी पुग्छन् । सो दिन सल्लेरी तथा फाप्लुमा बास बसेर भोलिपल्ट त्यहाँबाट खुम्बु पासाङ ल्हामु गाउँपालिका १ को थामडाँडासम्म बोलेरोमा जाने गरेका छन् ।
थामडाँडाबाट केही घण्टाको पदयात्रा पश्चात लुक्ला पुगेर बास बस्ने गरेको यातयात व्यवसायी राम बहादुर विश्वकर्माले बताए । खुम्बु जाने विदेशीको संख्या बढेसँगै सल्लेरी–थामडाँडा चल्ने गाडीको व्यवस्ता पनि बढेको उनको भनाइ छ ।
सल्लेरीबाट थामडाँडासम्मको सडक कच्ची रहेकाले बोलेरो (फोविल) मात्रै सञ्चालन हुने गरेको छ । यद्यपी सल्लेरीबाट खुम्बु जाने सडक कालोपत्रेको काम भने भइरहेको जनाइएको छ ।
प्रतिक्रिया दिनुहोस !
