परासी : नवलपरासीमा सञ्चालनमा रहेका अधिकांश एग्रोभेटहरू बिना इजाजत सञ्चालन भएको पाइएको छ । बिना इजाजत सञ्चालन भएका एग्रोभेटमा बजार क्षेत्रका भन्दा ग्रामीण क्षेत्रमा बढी छन् । विषादी र बिउ बिजन बिक्री वितरण गर्ने एग्रोभेटहरूले म्याद नाघेका किटनाशक औषधि र बिउ बिक्री गर्ने गरेको समेत पाइएको छ ।
कृषि ज्ञान केन्द्र नवलपरासीले गरेको अनुगमनका क्रममा इजाजत बिना एग्रोभेटहरु सञ्चालन भएको पाइएको हो । विषादी बिक्री गर्ने इजाजत लिएका अधिकांश एग्रोभेटहरूले इजाजात नलिई बिउ बिजनसमेत बिक्री गर्ने गरेको पाइएको ज्ञान केन्द्रका प्रमुख डा. रविन्द्रनाथ चौबेले बताए ।
विषादीको इजाजत लिएका फर्म सञ्चालकहरूले बिउ बिजनका लागि छुट्टै इजाजत लिनुपर्ने प्रावधान छ । बिउ बिजनका लागि कृषि ज्ञान केन्द्रबाट इजाजत प्रदान गरिने गरिएको छ । बिउ बिजन बिक्री गर्ने एग्रोभेटले विषादीका लागि छुट्टै कोठाको व्यवस्था गर्नुपर्ने भएपनि एउटै कोठामा राखेर बिक्री वितरण गर्ने गरेको पाइएको कार्यालय प्रमुख चौबेले बताए ।
रामग्राम, बर्दघाट, सुनवल नगरपालिकाका साथै प्रतापपुर र सरावल गाउँपालिकाका ११ वटा एग्रोभेटमा गरिएको अनुगमनमा केही एग्रोभेटमा भारतबाट ल्याइएका रासायनिक मल, र म्याद गु्रजेका विषादी र बिउ बिजनहरू फेला परेको उनले बताए । जिल्लामा ४० बढी एग्रोभेट सञ्चालनमा रहेका छन् ।
अनुगमनका क्रममा नवीकरण नगराएका र इजाजत नलिएका एग्रोभेटलाई इजाजत लिन र म्याद नाघेका विषादी र बिउ बिजनलाई छुट्ट स्थानमा राखी व्यवस्थापन गर्न व्यवसायीहरूलाई सुझाव दिइएको थियो । नियमविपरीत सञ्चालन भएका एग्रोभेटलाई सचेत गराउँदै आगामी दिनमा प्रक्रिया पूरा गरेर व्यवसाय सञ्चालन गर्न सुझाव दिइएको ज्ञान केन्द्रका प्रमुख डा. चौबेले बताए ।
व्यवसायी पसल बन्द गरी सम्पर्कविहीन
यसैबीच मंगलबार अनुगमन गर्न गएको टोलीलाई देखेपछि केही एग्रोभेट सञ्चालन गरेका व्यवसायीहरू पसल बन्द गरी हिँडेका थिए । पसल खोलेर बसेका व्यवसायीहरू पनि अनुगमन टोलीलाई देखेपछि पसल खुलै छाडेर सम्पर्कविहीन भएका थिए ।
अनुगमन टोलीले व्यवसायीलाई मोबाइल सम्पर्क गरेर बोलाउन खोज्दा पनि उनीहरू सम्पर्कमा आएका थिएनन् । व्यवसाय दर्ता र नियमविपरीत सञ्चालन भएका कारण पसल बन्द गरी व्यवसायी सम्पर्कमा आउन नखोजेको हुनसक्ने कृषि ज्ञान केन्द्र नवलपरासीले जनाएको छ ।
प्रतिक्रिया दिनुहोस !
