इलाम : इलाम र पाँचथरमा ११५ वर्षीय नागरिकले मतदान गरेका छन् । प्रतिनिधि सभा तथा प्रदेश सभाको आइतबारको निर्वाचनमा ११५ वर्षीय मतदाता सहभागी भएका हुन् ।
इलामको फाकफोकथुम गाउँपालिका-७, शिकारी भञ्ज्याङस्थित सिंहदेवी माध्यमिक विद्यालय केन्द्रका ११५ वर्षे मानबहादुर राईले मतदान गरेको जिल्ला प्रहरी कार्यालय इलामले जनाएको छ ।
उनको नागरिकतामा जन्म मिति १९६४ साल लेखिएको छ। तत्कालीन एकतप्पा गाउँ पञ्चायत वडा ५ मा उनको जन्म भएको हो ।
पाँचथरको फाल्गुनन्द गाउँपालिका १ कि ११५ वर्षीया मनरानी आङदेम्बेले पनि मतदान गरेकी छन् ।
उनले तिर्तिरे आधारभुत विद्यालयमा मतदान गरेकी हुन् । उनको नागरिकतामा जन्म मिति १९६४ साल जेष्ठ ११ गते उल्लेख छ ।
के भन्छन् उम्मेदवार ?
नेकपा (एकीकृत समाजवादी)का नेता तथा पूर्वप्रधानमन्त्री झलनाथ खनालले बीचमै गठबन्धन नटुट्ने बताएका छन् । आफ्नो निर्वाचन क्षेत्रमा मतदान गरेपछि खनालले संविधान र गणतन्त्र सुनिश्चित नहुञ्जेल अहिलेको गठबन्धन कायमै रहने बताए ।
इलामको सूर्योदय नगरपालिका–९, रम्फोकस्थित राष्ट्रिय आधारभूत विद्यालयमा मतदान गरेपछि खनालले गणतन्त्र र आउँदो निर्वाचित प्रतिनिधि सभाको आयुको सुनिश्चितता समेतका लागि गठबन्धन रहने बताए ।
क्षेत्र १ का उम्मेदवार तथा एमाले जिल्ला अध्यक्ष महेश बस्नेत र क्षेत्र २ का उम्मेदवार सुवासचन्द्र नेम्बाङ र गठबन्धनका तर्फबाट क्षेत्र न २ मा उम्मेदवार रहेका नेपाली कांग्रेसका जिल्ला सभापति डम्बर खड्काले सदरमुकामको महेन्द्ररत्न बहुमुखी क्याम्पस केन्द्रबाट मतदान गरे ।
उम्मेदवार नेम्वाङले निर्वाचनले देशलाई सहि दिशामा हिँडाएको बताए । उनले निर्वाचन पछि देशमा संवृद्धिको नयाँ ढोका खुल्ने बताए ।
उम्मेदवार बस्नेतले मतदानपछि देश लोकतन्त्रको बाटोमा अघि बढेको बताए । उनले जनताले देखेको समृद्ध नेपाल–सुखी नेपालीको सपना लोकतन्त्रका माध्यमबाट प्राप्त गर्न आवधिक निर्वाचन महत्वपूर्ण रहेको बताए ।
उम्मेदवार खड्काले निर्वाचनपछि आउने सरकारले देशमा आमूल परिवर्तन ल्याउने दावी गरे ।
जिल्लामा प्रतिनिधि सभाका २ र प्रदेश सभाका ४ निर्वाचन क्षेत्र छन् । २ लाख २४ हजार ८ सय ७७ मतदाता छन् । प्रतिनिधिसभा क्षेत्र १ मा १ लाख ९ हजार ५ सय ३५ मतदाता छन् । प्रतिनिधिसभा क्षेत्र २ मा १ लाख १५ हजार ३ सय ४२ मतदाता छन् ।
बिहान मतदाताको उपस्थिति निरासा जनक रहेपनि चार बजे सम्ममा ४५ प्रतिशत मतदान भएको छ ।
निर्वाचन शूरु भएको केही समयमा इलामको माइजोगमाई गाउँपालिका–५, सोयाङको शिरिसे मावि मतदान केन्द्रनजिक बम विस्फोट गराइएको थियो ।
मतदान चलिरहेकै बेला केही तल बारीमा विस्फोटको ठूलो आवाज आएको थियो । माटोमुनि पुरेको अवस्थामा रहेको वस्तु पड्किएको बताइएको छ । बिहान ९ बजेतिर विस्फोट भएको थियो ।
प्रतिक्रिया दिनुहोस !
