महोत्तरीमा अवैध रूपमा ल्याइएको कपडा बरामद
महोत्तरी : महोत्तरीमा अवैध रूपमा ल्याइएको कपडा बरामद गरिएको छ। सोमबार बिहान गौशाला नगरपालिका-२ निगौलबाट ३ वटा टेम्पु र २ वटा मोटरसाइकलमा लोड गरी गौशाला बजारतर्फ ल्याउँदै गरेको अवस्थामा ११ लाख २८ हजार ३ सय मूल्य बराबरको विभिन्न किसिमका कपडाहरू बरामद गरिएको हो।
जिल्ला प्रहरी कार्यालय महोत्तरीका अनुसार प्रहरीको गस्ती टोलीले प्र २– ०२–००१ ह १७२३ नम्बरको टेम्पो, स १ ह ५२८० नम्बरको टेम्पो, प्र ०४–००१ ह ०१५२ नम्बरको टेम्पो तथा बी आर ०० एटी ०४४१ नम्बरको मोटरसाइकल र बी आर एजेड ०६७९ नम्बरको मोटरसाइकलमार्फत तस्करहरूले सो कपडाहरू प्रहरीले नियन्त्रणमा लिएको छ ।
प्रहरीका अनुसार ३ वटा टेम्पुको अन्दाजी मुल्य ९ लाख र २ वटा मोटरसाइकलको अन्दाजी मूल्य १ लाख) गरी २१ लाख २८ हजार ३ सय रुपैयाँ बराबरको सामान नियन्त्रणमा लिइएको हो। अवैध रूपमा कपडा ल्याएको आरोपमा प्रहरीले ६ जनालाई पक्राउ गरेको छ।
गौशाला नगरपालिका-२ का ३० वर्षीय अताबुल राईन, २८ वर्षीय अस्लम बैठा धोवी, ३५ वर्षीय बिपिन कुमार चौधरी, तथा सम्सी गाउँपालिका-६ का २१ वर्षीय श्याम साह, सोही पालिकाको वडा नम्बर ७ का २२ वर्षीय विलौछन यादव, सोनमा गाउँपालिका-१ का २६ वर्षीय संजय कमार साह पक्राउ परेका हुन्।