पूर्वप्रधानमन्त्री ओली र नेपालका लागि अमेरिकी राजदूत थम्पसनबीच भेटवार्ता
काठमाडौं : पूर्वप्रधानमन्त्री केपी शर्मा ओली र नेपालका लागि अमेरिकाका राजदूत डीन आर थम्पसनबीच भेटवार्ता भएको छ। राजदूत थप्पसन मंगलबार बिहान एमाले अध्यक्ष ओलीलाई भेट्न बालकोट पुगेका हुन्।
भेटमा एमालेका नेता तथा विदेश विभाग प्रमुख राजन भट्टराईसमेत थिए। उनीहरुबीच दुई देशको पारस्परिक सम्बन्ध र अन्य समसामयिक विषयमा छलफल भएको बालकोट स्रोतले जनाएको छ।
असार अन्तिम साता अमेरिकी सहायक विदेशमन्त्री डोनाल्ड लुपनि एमसीसी कार्यान्वयनका विषयमा छलफल गर्न नेपाल आएका थिए। अमेरिकाले संसदबाट अनुमोदन भएको एमसीसी परियोजना कार्यान्वयनका लागि नेपालका राजनीतिक दलहरुलाई ताकेता गरिरहेको छ। एमसीसी परियोजना कार्यान्यवनको मिति नजिकिएसँगै अमेरिकी राजदूतले नेताहरुसँगको भेटलाई तिब्रता दिएका छन्।
एमसीसी सम्झौताअनुसार अमेरिकाले नेपाललाई ५० करोड अमेरिकी डलर अनुदान दिने घोषणा गरेको छ। हालको सत्ता गठबन्धनले १२ बुँदे व्याख्यात्मक घोषणासहित २०७८ साल फागुन १५ गते संसदबाट एमसीसी कम्प्याक्ट सम्झौता अनुमोदन गरेको थियो।