बझाङ : प्रदेश सभाको बझाङ–१ (१) को मतगणनामा एमालेको अग्रता कायमै रहेको छ। एमालेका दमनबहादुर भण्डारीले ३ हजार १८५ मतसहित अग्रता बनाइरहेका छन्। नेपाली कांग्रेसका अभिषेक बहादुर सिंहले २ हजार ५७० मतसहित पछ्याइरहेका छन्। तेस्रो स्थानमा रहेको माओवादीका उम्मेदवार जनकबहादुर बुढाको १ हजार ८३८ मत रहेको छ।
छबिसपाथिभेरा गाउँपालिकाको सबै वडाको मतगणना सकेर अहिले थलरा गाउँपालिका एउटा वडा र खप्तड छान्ना गाउँपालिकाको पाँच वटा वडाको मतगणना सकिएको छ। नेपाली कांग्रेसको राम्रो पकड रहेको खप्तडछान्नामा वडा नम्बर १ देखि ५ सम्म मतगणना गर्दा एमालेभन्दा कांग्रेस १ सय ७३ मतले मात्र अघि रहेको देखिएको छ।
एकीकृत समाजवादीका दिलबहादुर सिंहले १ हजार १९ मत ल्याएका छन्। बझाङमा अझै जयपृथ्वी नगरपालिकासहित सुर्मा, साइपाल, मष्टा, तल्कोट गाउँपालिकामा मतगणना हुन बाँकी छ। बझाङ सदरमुकाम चैनपुरस्थित जिल्ला अदालतमा आज दिउँसो २ बजेबाट सुरु भएको मतगणना दुई ठाउँबाट तीव्र रुपमा भइरहेको छ। अहिलेसम्म १३ वटा वडाको मतगणना सकिएको छ।
प्रतिक्रिया दिनुहोस !
