शरणार्थी प्रकरणमा भइरहेको छानबिनलाई कांग्रेसले पूर्ण सहयोग गर्नुपर्छ : प्रदीप पौडेल
काठमाडौं : नेपाली कांग्रेस नेता प्रदीप पौडेलले नक्कली भुटानी शरणार्थी प्रकरणमा भइरहेको छानबिन र अनुसन्धानलाई नेपाली कांग्रेसले पूर्णरुपमा सहयोग गर्नुपर्ने बताएका छन्।
उनले लेखेका छन्-’नक्कली भुटानी शरणार्थी प्रकरणमा भइरहेको छानबिन र अनुसन्धानलाई नेपाली कांग्रेसले पूर्णरूपमा सहयोग गर्नुपर्छ । कोही कसैले वा कहीं कतैबाट प्रभावित गर्ने काम हुनुहुँदैन । प्रकरणमा संलग्न जोकोहीलाई ढाकछोप गर्ने वा चोख्याउने काम नहोस् । ‘
उनले यो विषयमा अत्यन्तै गम्भीर भएर छानबिन गरी दोषी सबैलाई कानुन कठघरामा ल्याउनुपर्ने बताएका छन्। घटनामा नातावाद र कृपावादमा नपरी निष्पक्ष दृढतापूर्वक सरकार अगाडि बढ्नुपर्ने बताएका छन्।
‘को कुन पार्टीमा छ,कोसँग कसको के सम्बन्ध छ भन्ने कुनै पनि नातावाद र कृपावादमा नपरी छानबिन होस् । अत्यन्तै गम्भीर भएर छानबिन गरी दोषी सबैलाई कानुनी कठघरामा ल्याइयोस् । अनुसन्धान प्रकियामा निष्पक्ष भएर दृढतापूर्वक सरकार अगाडि बढोस् । ‘
नक्कली भुटानी शरणार्थी प्रकरणमा बुधबार नेपाली कांग्रेसका नेता एवं पू्र्वगृहमन्त्री बालकृष्ण खाँण र उनका स्वकीय सचिव नरेन्द्र केसी पक्राउ परेका छन्। प्रहरीले खाँडलाई आज बिहान उनकै निवासबाट पक्राउ गरेको हो।
यो सँगै उक्त घटनामा आरोपित ११ जनालाई प्रहरीले पक्राउ गरिसकेको छ । त्यसअघि प्रहरीले पूर्वगृहमन्त्री रामबहादुर थापाका सुरक्षा सल्लाहकार इन्द्रजित राईसहित बहालवाला सचिव (तत्कालीन गृहसचिव) टेकनारायण पाण्डे, सन्दीप रायमाझी, केशव दुलाल, सानु भन्डारी, टङ्क गुरुङ, सन्देश शर्मा पोखरेल र सागर थुलुङलाई पनि पक्राउ गरिसकेको छ ।
उक्त घटनामा आरोपित नेकपा (एमाले) का सचिव टोपबहादुर रायमाझीलाई भने प्रहरीले खोजी गरिरहेको छ । जिल्ला प्रहरी परिसरले उनीविरुद्ध सङ्गठित अपराधमा अनुसन्धान गरिरहेको छ । उक्त घटनामा हालसम्म एक सय छ जनाले २० जाहेरी दिएका छन् । उनीहरूले कुल रु २३ करोड २५ लाख ठगी भएको भनी प्रहरीमा जाहेरी दिएका छन् ।