जनकपुरलाई अाकर्षक बनाउन १ अर्ब १४ करोडको योजना
जनकपुरधाम : प्रदेश २ को राजधानी जनकपुरलाई सुन्दर बनाउन तथा पोखरी सम्बद्र्धन गर्न भन्दै १ अर्ब १४ करोडको आयोजना ल्याइएकाे छ ।
खानेपानी मन्त्रालय अन्तरगत खानेपानी तथा ढल व्यवस्थापन विभाग, खानेपानी तथा सरसफाइ आयोजना व्यवस्थापन कार्यालय र जनकपुरधाम उपमहानगरपालिका कार्यालयबीच ‘जनकपुरधाम सरसफाई तथा पोखरी सम्बद्र्धन आयोजना’ का लागि समझदारी भएको हो ।
बिहीबार जनकपुरधाम उपमहानगरपालिका कार्यालयमा सम्झौता बारे विस्तृत जानकारी गराउँदै मेयर लालकिशोर साहले यस सम्झौताले जनकपुरको मुहार फेरिने दावी गरेका छन् ।
स्वीकृत ढल व्यवस्थापन नीति २०७५ अनुरुप आयोजना व्यवस्थापन कार्यालय काठमाडौं र जनकपुरधाम उपमहानगरपालिका कार्यालय बीच मंगलबार समझदारी भएको हो । समझदारी पत्रमा सहलगानी खानेपानी तथा सरसफाई आयोजना, व्यवस्थापन कार्यालयको तर्फबाट आयोजना प्रमुख विद्यानाथ भट्टराई र जनकपुरधाम उपमहानगरपालिकाको तर्फबाट मेयर लालकिशोर साहले हस्ताक्षर गरेका हुन् ।
आयोजनाको सुरुवात २०७५÷०७६ मा टेन्डर आह्वान गर्दै २०७७÷०७८ मा सम्पन्न गरिसक्ने बताइएको छ । कुल लागत इष्टिमेट रकम भ्याट बाहेक १ सय २ करोड ५० लाख ९० हजार ३७३ रहेको र यसमा भ्याट जोड्दा १ सय १४ करोड हुन आउने मेयर साहले जानकारी गराए ।
आयोजना अन्तरगत नगरक्षेत्र भित्रका ३१ वटा पोखरीहरुको सम्बद्र्धन गरिने, रंगभूमि मैदान सरसफाई तथा सम्बद्र्धन, ३० वटा सार्वजनिक शौचालय निर्माण र सरसफाइ सम्बन्धी अन्य कार्य गरिने बताइएको छ ।
पोखरीहरुमा सोलार लाईट जडान गरी झिलिमिली बनाउने, त्यहाँ वृक्षारोपण तथा मनोरम पार्क निर्माण लगायत कामहरु यस आयोजना मातहत गरिने छ । यस्तै जनकपुरका एतिहासिक धनुषसागर, गंगासागर र अंगराजसर पोखरीलाई विशेष सौन्दर्यीकरण गरिने छ । जस अन्तरगत म्युजिकल फाउन्डेशन निर्माण गरी लेजर लाईटबाट पोखरीमा जानकी लिला प्रर्दशन गरिने लगायत काम गरिने जनाइएको छ ।
आयोजनाले नगरपालिकाको १ देखि १६ सम्म र २५ नम्बर वाड लोहना गाउँलाई समावेश गरी सञ्चालन गरिने भएको छ । लोहना गाउँलाई नमुना बनाउन लागि ३ किलोमिटर अन्डरग्राउन्ड ड्रेनेज निर्माण र पिसिसी सडक ढलानका साथै तीनवटा पोखरीलाई छुट्टै सौन्दर्यीकरण गरिने बताइएको छ । यस आयोजनाको सफल कार्यान्यवन भयो भने जनकपुरवासीको जीवनस्तर उकासिने र यो सहर पर्यटकीय गन्तव्य बन्न सफल हुने विश्वास नगर प्रमुख साहको छ ।