हेटौंडा : राष्ट्रियसभा निर्वाचनका लागि बागमती प्रदेशतर्फको मतदान प्रक्रियाका लागि तयारी पूरा भएको प्रदेश निर्वाचन कार्यालय हेटौंडाले जनाएको छ । बागमती प्रदेशतर्फ खाली रहेको ४ सिटका लागि भोलि विहिबार निर्वाचन हुँदैछ ।
निर्वाचनका लागि आवश्यक तयारी पूरा भएको र शान्ति सुरक्षाको प्रबन्ध मिलाइएको प्रदेश निर्वाचन कार्यालय हेटौंडाका निमित्त प्रमुख ताराप्रसाद आचार्यले जानकारी दिए । हेटौंडा ४ स्थित भुटनदेवी माविको प्राङ्गणमा हुने मतदान प्रक्रियामा बागमती प्रदेशसभाका ११० जना सदस्यहरु, प्रदेशका ११९ वटै स्थानीय तहका प्रमुख तथा उपप्रमुख २३७ जना गरी कूल ३४७ जनाले मतदान गर्ने निमित्त प्रमुख आचार्यले जानकारी दिए ।
उनका अनुसार प्रदेश सभा सदस्यको मतभार ५३ र स्थानीय तहको प्रमुख तथा उपप्रमुखको पदभार १९ रहेको छ ।
मतदान केन्द्रमा अधिकृतसहित १०–१० जना गरी २० जना कर्मचारी खटाइने आचार्यले बताए । उनका अनुसार मतदान केन्द्र अनुसार मतपत्रको रङ पनि फरक–फरक रहने जनाइएको छ ।
विहान ९ बजेबाट मतदान प्रक्रिया सुरु भई ३ बजे समाप्त हुने र मतदान सकिएलगत्तै मतगणना सुरु गरिने र नतिजा पनि साँझ नै आउने जनाइएको छ । उक्त निर्वाचनका लागि बागमती प्रदेशमा सत्तारुढ गठबन्धन, नेकपा एमाले, राप्रपा र नेमकिपाको गरी कूल १५ जनाको उम्मेदवारी परेको छ ।
प्रतिक्रिया दिनुहोस !
