सरकारी विद्यालयमा सीसी क्यामरा
राजविराज : विद्यालयको पठनपाठन गुणस्तरीय बनाउन राजविराज –३ स्थित केशो अनिरुद्धवति माध्यमिक विद्यालयमा सीसी क्यामेरा जडान गरिएको छ ।
प्रधानाध्यापक फुलेश्वर मण्डल र व्यवस्थापन समितिका अध्यक्ष धीरेन्द्र बर्मा ‘धीरु’ को पहलमा शैक्षिक सुधारका लागि कक्षाकोठा, लेखा, प्रशासन लगायतको कोठामा सीसी क्यामेरा जडान गरिएको हो ।
अध्यक्ष धीरेन्द्र बर्मा ‘धीरु’ ले चार लाख दुई हजारको लागतमा विद्यालयको सबै कोठामा सीसी क्यामेरा जडान गरिएको जानकारी दिँदै निकट भविष्यमै विद्युतीय हाजिरीको व्यवस्था समेत गर्न लागेको बताए ।
कक्षा १० सम्म पठनपाठन हुने उक्त विद्यालयका सबै कक्षा कोठा, लेखा र प्रशासन फाँटसहित १३ वटा कोठामा सीसी कयामरा जडान गरिएको प्रधानाध्यापक मण्डलले बताए ।
कक्षा कोठामा विद्यार्थीको पढाइ, शिक्षकले पढाउने तरिकालाई निगरानीमा राख्न र अनुशासन कायम गर्न सीसी क्यामेराले महत्वपूर्ण भूमिका खेल्ने प्रअ मण्डलको विश्वास छ ।
गुणस्तरिय शिक्षाका लागि सरकारी विद्यालयमा सीसी क्यामेरा जडान गर्ने पहिलो विद्यालय केशो अनिरुद्धवति माविले थालेको प्रयासको स्थानीय अभिभावकले प्रशंसा गरेका छन् ।
वि.स. २००९ सालमा स्थापित सप्तरीको पुरानो विद्यालयमा हाल सात सय १५ विद्यार्थी अध्ययनरत छन् ।
प्रतिक्रिया दिनुहोस !
