अहिलेका नेता खुद्रे राजा हुन् : हृदयश त्रिपाठी
नवलपरासी : आन्दोलनको नेतृत्व लिन राष्ट्रिय जनता पार्टी (राजपा) का वरिष्ठ नेता ह्दयश त्रिपाठी शुक्रबार परासी पुग्नु भएको छ ।
सदरमुकाम परासीमा पुग्नु भएका नेता त्रिपाठीले चार दिने मधेस बन्दको समापन सभालाई सम्बोधन गर्दै सरकारले राजपाको सहमति बिना चुनावको मिति सारेको भन्दै त्यसले आफूहरुको आन्दोलनलाई कुनै फरक नपार्ने बताउनुभयो ।
चुनाव सार्दैमा २ नम्बर प्रदेशको आन्दोलन नरोकिने भन्दै १४ गतेसम्म सबै तराई मधेसमा एउटै आन्दोलन सुरु हुने त्रिपाठीले बताउनुभयो । तीन दलतर्फ लक्षित गर्दै नेता त्रिपाठीले भन्नुभयो, ‘जर्वजस्ती चुनाव गराउन खोज्दा होलसेलका राजा त फालिए भने यिनिहरु त खुद्रा राजा हुन, त्यसैले आन्दोलनलाई दबाउन खोजे मधेसी जनताले उम्मेदवारी दर्ता र मतदानका दिन भजन गाएर बस्दैन ।’
अहिलेको चुनाव उम्मेदवारी दर्ता र मतदान कार्य रोक्ने मात्र नभई मधेसी जनताका लागि जनमत संग्रह भएकोले निर्णायक आन्दोलनमा उत्रिन त्रिपाठीले कार्यकर्तालाई आव्हान गर्नुभयो । ‘यो आन्दोलन संविधान कार्यान्वयन गर्न खोज्ने र नमान्नेका बीचको हो । त्यसैले मधेसी जनता अन्तिम साससम्म लडिरहनु पर्छ ।’
प्रदेश नम्बर २ मा चुनावको मिति सारेर लिम्बुवान, थरुहट र तराई मधेसमा फुट ल्याउन खोजेको उहाँको भनाइ छ । त्रिपाठीले संविधान संशोधनको माग पूरा नभएसम्म आन्दोलन जारी रहने बताउनुभयो ।
प्रतिक्रिया दिनुहोस !
