पुनः डिजाइनपछि पनि बनेन पुल

भोजपुरः उत्तरी छिमेकी जिल्ला संखुवासभा जोड्ने अरुण नदीस्थित निर्माणाधीन लम्सुवाघाटको पुल पुनः डिजाइनपछि पनि निर्माण हुन सकेको छैन ।संखुवासभाको तुम्लिङ्टार र उत्तरी षडानन्द नगरपालिका जोड्ने एक मात्र बोर्डरका रूपमा रहेको लम्सुवाघाटको पुल पाँच वर्षअघि स्वच्छन्द निर्माण सेवाले निर्माण सुरु गरेको थियो ।

कम्पनीले ३ वर्षभित्र निर्माण सम्पन्न गर्ने गरी ०६७ साल असार २५ मा सम्झौता गरेको थियो । तर, पुल निर्माण सुरु भएलगत्तै काम रोकिएको थियो । किनकि पुलको जग खन्ने क्रममा ठूलो चट्टान भेटिएको भन्दै ठेकेदारले काम छाडेका थिए । पछि पुनः डिजाइन गरियो । डिजाइन गरे पनि तोकिएको समय सकिन लाग्दासमेत पुल निर्माण थालनी शुन्य भएको छ ।

अहिलेसम्म पुलको २० प्रतिशत मात्र काम सकिएको छ । बनेका ४ वटा वेलमध्ये ३ वटा वेल चट्टानकै कारण बिग्रिएकाले पुनर्निर्माण गर्नुपर्ने अवस्था भएको हो । पहिलो सम्झौताअनुरूप निर्माणलाई निरन्तरता दिन नसक्ने भन्दै ठेकेदार र कामदारले काम ठप्प पारेपछि पुलको पुनः डिजाइन गरिएको थियो ।

पुल नबनेसँगै जिल्लाका उत्तरी भेगका स्थानीय बजारमा महँगी छोएको छ । पुल नबन्दा डुंगा र झोलुंगे पुलको सहायताले दैनिक उपभोग्य पदार्थ ओसारपसार गर्नुपर्ने हुन्छ । संखुवासभाको सदरमुकाम खाँदबारीसँग यातायातको सिधा पहँच नहुँदा गाडी रिजर्भको ढुवानी अत्यधिक महँगो हुने गरेको छ । खाँदबारीबजार उत्तरी भेगका सर्वसाधारणको मुख्य व्यापारिक नाका हो ।

दैनिक उपभोग्य खाद्य सामग्री नुन, तेल, चिनीलगायतमा गत वर्षको तुलनामा २५ प्रतिशतले महँगी वृद्धि भएको छ । आधा लिटर रिफाइन्ड खाने तेलको पोकालाई सय रुपैयाँ पर्छ । धरानदेखि खाँदबारी, तुम्लि¨टार, सतिघाट, लम्सुवाघाट हुदै दिङ्गलाबजार सामान ल्याउदा ढुवानी खर्च मात्रै कम्तीमा १० रुपैयाँ लाग्ने गरेको छ । लम्सुवाघाटको पक्की पुलबाहेक अन्य विकल्प नभएकाले पनि सास्ती खेप्नुपरिरहेको स्थानीयले बताए ।

वर्षौंदेखि अलपत्र लम्सुवाघाट पुलको चाँडो निर्माणका लागि भोजपुर र संखुवासभाका स्थानीयले सडक डिभिजन कार्यालय तुम्लिङटारमा पटक-पटक प्रतिनिधिमण्डलसहित पुगेका छन् । दसैं-तिहारलगत्तै पुल निर्माण सुरु गर्न ठेकेदारसँग सर्वपक्षीय निर्णय गरिएको थियो । तर, निर्माण कार्य सुचारु गर्न नसकेको सडक डिभिजनका प्रमुख घनश्याम गौतमले बताए । ‘चाँडो काम सुचारु गर्न ठेकेदारलाई ताकेता गर्दा निर्माणस्थलमा मेसिन लैजाने क्रममा बिग्रिएकाले काममा ढिलाइ भइरहेको हो,' उनले भने । स्काभेटर मेसिन तत्काल मर्मत गर्न र पुल निर्माण कार्यलाई चाँडो सुचारु गर्न निर्माण कम्पनीलाई आदेश दिइसकेको उनले बताए ।

दोहोरो गाडी गुड्न सक्ने क्षमता भएको निर्माणाधीन पुल २ सय ५४ दशमलव ७ मिटर लामो छ । पुनः डिजाइन गर्दा अघिल्लो डिजाइनमा ८७ दशमलव २ मिटर लम्बाइ थपिएको छ । यसअघिको डिजाइनमा पुल १ सय ६७ दशमलव ५ मिटर लामो थियो । पुनः डिजाइनमा थपिएको ७२ मिटर बाहेकको निर्माणका लागि पनि साविककै स्वच्छन्द निर्माण सेवालाई नै ठेक्का दिइएको छ । उसैको कार्यक्षेत्रभित्र थपिएको लम्बाइ समेटिने भएकाले जिम्मा दिएको गौतमले बताए । अघिल्लो डिजाइनमा १४ करोड लागतमा निर्माण सक्ने सम्झौता भएको थियो । पछि फेरि डिजाइन परिवर्तन गरी २० करोड लागतमा पुगेको हो । पुनः डिजाइनपछि ०७४ साल असार २४ गतेभित्र काम सम्पन्न गर्नेगरी समय थप भएको छ । बाँकी ७२ मिटरको ठेक्काका लागि नयाँ टेन्डर आह्वानको प्रक्रियामा छ ।