देश दाैडाहमा उद्योगी व्यवसायी

दिक्तेलः नेपाल उद्योग बाणिज्य महासंघको महाधिबेसन नजिकीदैगर्दा उद्योगी व्यवसायीहरु हेलीकोप्टर चढेर भोट माग्न देश दौडाहमा लागेका छन् । आगामी चैत्र २८ गते हुने महाधिबेसनलाई लिएर आकांक्षी उद्योगी व्यवसायीहरुको टोलिले खोटाङबाट भोट माग्न सुरु गरेका छन् ।

उद्योग बाणिज्य महासंघको केन्द्रीय सदस्य कल्पना गैरे शनिवार हेलीकोप्टर चढेर पुनः केन्द्रीय सदस्यमा आफुलाई जिताउन भोट माग्दै खोटाङ आएकी हुन् । बिहान हलेसी महादेबस्थानको दर्शन गर्दै हेलीकोप्टरबाटै सदरमुकाम दिक्तेल उत्रिएकी गैरेले आगामी महाधिबेसनमा केन्द्रीय सदस्य पदमा जिताउनका लागि भोट मागिन् । ‘हलेसीको दर्शन गरेर मैले खोटाङबाट भोट माग्ने अभियान सुरु गरेकी छु,' खोटाङ उद्योग बाणिज्य संघले आयोजना गरेको कार्यक्रममा गैरेले भनिन्, ‘भोट दिएर सहयोग गर्नुस्, तपाईहरुलाई पनि मेरो साथ र सहयोग रहने छ ।'

नेपाल उद्योग बाणिज्य महासंघको हरेक महाधिबेसनकाक्रममा आकांक्षीहरु जिल्ला दौडाहामा निस्कने गरेका छन् । उद्योग बाणिज्य संघ काभ्रेका अध्यक्ष सुरकृष्ण बैद्य जिल्ला भ्रमणको बाहनामा फागुन १० गते केन्द्रीय सदस्यकैलागि भोट माग्न दिक्तेल आएको केही समय नसबत्दै गैरे पनि दिक्तेल आइपुगेकी हुन् । खोटाङबाट भोट माग्न सुरु गरेकी गैरेले एकै दिन भोजपुर र तेर्‍हथुममा पुगेर भोट मागेकि छन् ।

हाल महासंघको केन्द्रीय सदस्यकै भूमीकामा रहेकी गैरेले खोटाङ उद्योग बाणिज्य संघको भवन निर्माणका लागि सहयोग गर्ने आश्वसन दिएकी छन् । उनको चुनावी अभियानमा कैलाली उद्योग बाणिज्य संघका अध्यक्ष शंकरबहादुर बोगटी, पुर्वअध्यक्ष दिनेश भण्डारी र बैतडी उद्योग बाणिज्य संघका अध्यक्ष नरबहादुर चन्दले साथ दिएका छन् ।

नाईन एन-एएल्डी हेलीकोप्टरबाट दिक्तेलमा उत्रिएकी गैरेल एक घण्टासम्म दिक्तेलमा बसेर भोजपुर उँडेकी हुन् ।उनीहरुको स्वागतमा उद्योग बाणिज्य संघ खोटाङले आफ्नै कार्यालयमा स्वागत तथा सम्मान कार्यक्रम राखेको थियो । खोटाङ उद्योग बाणिज्य संघका अध्यक्ष राजेन्द्र लयालुले गैरेको टोली चुनावी अभियानकाक्रममा जिल्ला आइपुगेको बताए । ‘जिल्ला भ्रमणकाक्रममा उहाँहरु आउनु भएको हो,' लयालुले भने, ‘जुनसुकै बाहनामा हिँडेपनि उहाँहरु चुनावी दौडमा निस्कनु भएको हो ।'