झापा-११ गभर्नर्स गोल्डकपको फाइनलमा
बिर्तामोडः भारतको गान्तोकमा जारी ३६औं गभर्नरस गोल्डकप फुटबल प्रतियोगितामा रमपम झापा—११ ले फाइनल यात्रा तय गरेको छ ।
सोमबार भएको पहिलो सेमिफाइनल खेलमा सिक्किमकै हिमालयन फुटबल क्लबलाई १-० गोलले हराउँदै झापा फाइनलमा पुगेको हो ।निर्धारित ९० मिनेटको खेलमा कुनै गोल हुन नसकेपछि इन्जुरी समयको तेस्रो मिनेटमा झापाका लागि स्ट्राइकर नरेन्द्र लिम्बूले निर्णायक गोल गरेका थिए ।
खेलको सुरुदेखि नै झापाले खेलमा दबाब कायम गरेको थियो । ३७औं मिनेटमा सिक्किमका थोपोफिलस एपोहले गरेको प्रहार गोलपोस्टभन्दा निकै माथिबाट बाहिर हुइँकिएको थियो ।
४२औं मिनेटमा झापाका स्ट्राइकर कर्ण लिम्बूको प्रहार गोलपोस्टमा लागेर फर्किएको थियो । अधिकांश दर्र्शकको साथ पाएको झापाका खेलाडी दिलेन लोक्ताम ६५औं मिनेटमा घाइते भएका थिए ।
बिहीबार भएको क्वार्टरफाइनल खेलमा इन्डियन लिग खेल्ने मुम्बईको ओएनजीसी क्लबलाई ४-३ गोलले हराउँदै झापा सेमिफाइनलमा प्रवेश गरेको थियो । झापाले पहिलो खेलमा भने एसईबी केरलालाई ४–१ गोलले हराउँदै क्वार्टरफाइनलमा स्थान पक्का गरेको थियो ।
मंगलबार हुने प्रतियोगिताको दोस्रो सेमिफाइनल खेलमा आक्रमण फुटबल क्लब गान्तोक र महमद्धन् स्पोर्टिङ क्लब कोलकाताबीभ भिडन्त हुनेछ । उक्त खेलको विजेतासँग झापाले उपाधिका लागि भिडन्त गर्नेछ । फाइनल खेल आगामी बिहीबार हुनेछ ।
प्रतिक्रिया दिनुहोस !
