बराबरीमा रोकिए युनाइटेड र लिभरपुल
लिभरपुलः इङ्लिस प्रिमियर लिग फुटबलको सोमबार राति भएको खेलमा म्यानचेस्टर युनाइटेड र लिभरपुलले गोलरहित बराबरी खेल्दै अंक बाँडेका छन् । उक्त नतिजासँगै इङ्लिस फुटबलका यी दुवै प्रभावशाली टोलीले अंकतालिकामा माथि उक्लने अवसर गुमाएका छन् । लिभरपुलको मैदानमा भएको खेलमा म्यान युनाइटेडका खेलाडीले अधिकांश समय खुट्टामा बल नचाए पनि गोल भने गर्न सकेनन् ।
अनुभवी प्रशिक्षक जोसे मोउरिन्होको नेतृत्वमा रहेको म्यान युनाइटेडले आफ्नो घरेलु मैदानमा खेलिएको खेलमा गोल गर्न नसकेको करिब १० महिनाको अवधिमा यो पहिलो पटक हो ।
प्रशिक्षक मोउरिन्होले आफ्ना खेलाडीले प्राविधिक खेल खेल्दै अधिकांश समय बलमाथि नियन्त्रण राखे पनि गोल गर्न नसक्नु दुर्भाग्य भएको प्रतिक्रिया दिए । ‘मेरा खेलाडीले स्तरीय खेल प्रदर्शन गरे, बलमाथि पनि हाम्रै नियन्त्रण बढी थियो तैपनि हामी गोल गर्न असफल भयौं', उनले भने । उनले आफू नतिजाबाट सन्तुष्ट रहेको बताए ।
सहभागी सबै टोलीले आठआठ खेल खेलिसक्दा लिभरपुल १७ अंकसहित तालिकाको चौथो स्थानमा छ । म्यान युनाइटेड भने १४ अंकसहित तालिकाको सातौं स्थानमा आसीन छ । जारी सिजनको लिगमा उत्कृष्ट प्रदर्शन गरिरहेको लिभरपुलले म्यान युनाइटेडलाई हराएको भए लिग लिडर म्यानचेस्टर सिटीसँग अंक बराबरी गर्ने थियो ।
तालिकाको पहिलो स्थानमा आसीन म्यान सिटीको १९ अंक छ । समान अंक जोडे पनि गोलअन्तरका आधारमा आर्सनल दोस्रो स्थानमा छ भने १८ अंकसहित टोट्टनहाम तेस्रो स्थानमा रहेको छ । पाँचौं स्थानमा आसीन चेल्सीको १६ र छैटौं स्थानमा रहेको एभर्टनको १५ अंक छ । ६ अंकसहित स्टोक सिटी, चार अंकसहित स्वान्सी सिटी र दुई अंकसहित सन्डरल्यान्ड भने रेलिगेसन क्षेत्रमा छन् ।
लिभरपुल जारी सिजनको लिगमा हालसम्म सर्वाधिक गोल गर्ने टोलीमध्ये एक हो । हालसम्म एक खेलमा मात्र पराजय भोगेको लिभरपुलले हालसम्म घरेलु मैदानमा नौ गोल गरिसकेको छ । लिभरपुलका प्रशिक्षक योर्गेन क्लोपले भने नतिजाबाट आफू सन्तुष्ट नरहेको प्रतिक्रिया दिए । ‘यो नतिजा हाम्रा लागि अप्रिय हो ।
यो खेलको नतिजा त म्यानचेस्टर युनाइटेडले चाहेजस्तो आयो', खेलपछि प्रशिक्षक क्लोपले भने । उनले आगामी खेलमा आफ्नो टोलीमा केही सुधारको आवश्यकता रहेको धारणा पनि व्यक्त गरे ।
प्रतिक्रिया दिनुहोस !
