इकार्डीको कप्तानी संकटमा
मिलानः महत्वपूर्ण खेलमा पेनाल्टीमा समेत गोल गर्न चुकेपछि इन्टर मिलानमा मउरो इकार्डीको कप्तानी संकटमा परेको छ । इटालियन सिरिए फुटबलको आइतबार राति भएको खेलमा इकार्डीले पेनाल्टी प्रहारको अवसर खेर फालेपछि इन्टर मिलान काग्लिआरीसँग २-१ गोलले पराजित हुन पुगेको थियो । पराजयसँगै आठ खेलबाट ११ अंकमात्रै जोड्न सकेको इन्टरतालिकाको ११ औं स्थानमा सीमित भएको छ ।
खेलको पहिलो हाफमै प्राप्त पेनाल्टी प्रहारको अवसरमा गोल गर्न चुकेपछि इकार्डीको व्यापक आलोचना भएको थियो । खेलको २६ औं मिनेटमा ब्रुनो आल्भेसले इकार्डीलाई पेनाल्टी बक्सभित्र लडाएपछि इन्टरले पेनाल्टी प्रहारको अवसर पाएको थियो । यद्यपि इकार्डीले पोस्टभन्दा बाहिर प्रहार गरेपछि आफ्नै मैदानमा सयौंको संख्यामा उपस्थित इन्टरका समर्थक आक्रोशित बनेका थिए । खेल अवधिभर इन्टरका समर्थकले ब्यानरसहित इकार्डीको विपक्षमा नाराबाजी गरेका थिए ।
पेनाल्टी प्रहारको अवसर खेर फालेपछि इन्टरका उपाध्यक्ष जेभियर जानेट्टीले पनि इकार्डीको कप्तानीको विषयमा छलफल गरिने प्रतिक्रिया दिएका छन् । इन्टरका प्रशिक्षक फ्राङ्क डी बोइरले पनि यस विषयमा छलफल हुने संकेत गरेका छन् । ‘हामी यस विषयमा गम्भीरताका साथ छलफल गर्नेछौं', प्रशिक्षक बोइरले भनेका छन्, ‘त्यसमा खेलाडी र हाम्रा समर्थकलाई पूर्ण सम्मान दिएर छलफल गरिनेछ ।'
खेलको दोस्रो हाफ सुरु भएको १० मिनेटपछि नै जोए मारियोले इन्टरलाई १-० को अग्रता दिलाएका थिए । काग्लिआरीका गोलरक्षक मार्का स्टोरारीले फर्काएको बललाई गोलमा परिणत गर्दै मारियोले टोलीलाई अगाडि बढाएका थिए । तर त्यसपछि लगातार दुई गोल व्यहोर्दै इन्टर आफ्नै मैदानमा महत्वपूर्ण तीन अंक गुमाउन बाध्य बन्यो ।
काग्लिआरीको जितमा फेड्रिको मेल्चिओरीको भूमिका महत्वपूर्ण रह्यो । ७१ औं मिनेटमा टोलीका लागि बराबरी गोल फर्काएका मेल्चीओरीले टोलीको विजयी गोलका लागि पनि महत्वपूर्ण भूमिका निर्वाह गरे । उनकै प्रहारलाई इन्टरका गोलरक्षक समीर हान्दानोभिचले आफ्नै पोस्टमा छिराएपछि काग्लिआरी २-१ ले विजयी बनेको थियो । आठ खेलबाट १३ अंक बनाएको काग्लिआरी तालिकाको सातौं स्थानमा उक्लिएको छ ।
अर्को खेलमा एसी मिलानले महत्वपूर्ण जित हात पार्यो । एसी मिलानले चिएभो भेरोनालाई ३-१ गोलले हरायो । एसी मिलान अंकतालिकाको तेस्रो स्थानमा उक्लिएको छ । आठ खेलपछि दोस्रो स्थानको रोमासँग समान १६ अंक बनाए पनि गोलअन्तरमा पछि परेको एसी मिलान तेस्रो स्थानमा पुगेको हो । चिएभोको मैदानमा भएको खेलको पहिलो हाफमा १–० को अग्रता बनाएको एसी मिलानले दोस्रो हाफमा थप दुई गोल गर्दै जित पक्का बनाएको थियो ।
खेलको ४५ औं मिनेटमा जुराज कुक्काले पहिलो गोल गरे । दोस्रो हाफ सुरु भएलगत्तै एमबाये नियाङले आकर्षक गोल गर्दै एसी मिलानलाई २-० ले अघि बढाएका थिए । ७६ औं मिनेटमा भाल्टर बिर्साले फ्रिकिकमार्फत गोल गर्दै चिएभोलाई खेलमा फर्काउने प्रयास गरे ।
तर कार्लास बाक्काको प्रहारलाई रोक्ने प्रयासमा चिएभोका डिफेन्डर डारियो डाइनेल्लीले बल आफ्नै पोस्टभित्र छिराएपछि एसी मिलानको जित ३-१ ले पक्का बनेको थियो । चिएभोले यो वर्ष आफ्नो मैदानमा पराजय व्यहोरेको पहिलो पटक हो । आठ खेलबाट १३ अंक भएको चिएभो तालिकाको छैटौं स्थानमा छ ।
प्रतिक्रिया दिनुहोस !
