किर्गियस आठ साताका लागि निलम्बनमा
लन्डनः खेलका क्रममा अशोभनीय व्यवहार प्रदर्शन गरेको आरोपमा एटीपीले अस्ट्रेलियन टेनिस खेलाडी निक किर्गियसलाई आठ सातासम्म कुनै पनि प्रतियोगिता खेल्न नपाउने गरी निलम्बन गरेको छ ।
एटीपीको उक्त निर्णयपछि २१ वर्षीय किर्गियसले अब जारी सिजनको बाँकी अवधि कोर्टबाहिर बिताउनुपर्नेछ । उनी आगामी जनवरी १५ देखि मात्र कोर्टमा फर्कन पाउनेछन् । उनले वर्षको पहिलो ग्रान्डस्लाम प्रतियोगिता अस्ट्रेलियन ओपन भने खेल्न पाउनेछन् ।
निलम्बनसँगै एटीपीले किर्गियसलाई थप २५ हजार अमेरिकी डलर जरिवाना तिराउने निर्णय पनि गरेको छ । पटकपटक अनुशासनसम्बन्धी विवादमा फस्दै आएका किर्गियसले हालसम्म तिरेको यो सबैभन्दा ठूलो जरिवाना हो । हालै चीनमा सम्पन्न सांघाई ओपन टेनिस प्रतियोगिताका क्रममा खेल भावना विपरीतको कार्य गरेको आरोपमा किर्गियसलाई दण्डित गरिएको हो ।
उक्त विषयमा छानबिन गर्न एटीपीले समिति गठन गरेको थियो । सोही समितिको प्रतिवेदनका आधारमा किर्गियसलाई निलम्बन र जरिवाना तिराउने निर्णय गरिएको बताइएको छ । सोही आरोपमा गत साता आयोजकले पनि उनलाई १६ हजार पाँच सय अमेरिकी डलर जरिवाना तिराउने निर्णय गरेको थियो ।
सांघाई मास्टर्सको दोस्रो चरणको खेलका क्रममा उनले आक्रामक व्यवहार प्रदर्शन गरेका थिए । त्यतिबेला उनले खेलका क्रममा अशोभनीय व्यवहार प्रदर्शन गरेको आरोपमा १० हजार, दर्शकमाथि अपशब्द प्रयोग गरेको आरोपमा पाँच हजार र खेल भावनाविपरीतको आचरण प्रदर्शन गरेको आरोपमा एक हजार पाँच सय अमेरिकी डलर जरिवाना तिराउने निर्णय गरिएको थियो ।
किर्गियस दोस्रो चरणको खेलमा तुलनात्मक रूपमा कमजोर जर्मन प्रतिद्वन्द्वी मिसचा जाभरेभसँग ६-३, ६-१ ले पराजित भएका थिए । हाल विश्व वरीयताको १४औं स्थानमा रहेका किर्गियसले कुनै कारणबिना नै अम्पायर अली निलीसँग बीचैमा खेल परित्याग गर्ने अनुमति मागेका थिए । यसैगरी उनले खेल सकिएपछि दर्शकलाई समेत अपशब्द प्रयोग गरेका थिए । उनले राम्रो खेल्न नसकेको भन्दै दर्शकले आलोचना गरेपछि किर्गियसले दर्शकलाई नै कोर्टमा आएर राम्रो खेल्न चुनौती दिएका थिए ।
यसैगरी खेलका क्रममा उनी आफ्ना प्रतिद्वन्द्वीविरुद्घ सर्भिस गरेर जवाफी प्रहारको प्रतीक्षा नै नगरी सीधै कोर्टबाट बाहिरिएका थिए । किर्गियसले भने आफू निकै थकित भएकाले कोर्टबाट बाहिरिएको र तनावमा आएको दाबी गर्दै आएका छन् । ‘लगातार एकपछि अर्को प्रतियोगिता खेल्नु परेकाले म शारीरिक र मानसिक रूपमा निकै थकित थिएँ, त्यसैले मबाट त्यस्तो व्यवहार प्रदर्शन हुन गयो’, उनले आफ्नो बचाउ गर्दै भनेका छन् ।
यसअघि पनि किर्गियसले केही प्रतियोगितामा आक्रामक व्यवहार प्रदर्शन गरेका थिए । गत वर्ष क्यानडाको मोन्ट्रियलमा खेलिएको प्रतियोगितामा पनि उनले प्रतिद्वन्द्वी स्टान वावरिन्कालाई दुव्र्यवहार गरेका थिए । उक्त व्यवहारका लागि त्यति बेला किर्गियसलाई १२ हजार पाँच सय अमेरिकी डलर जरिवाना तिराइएको थियो ।
त्यति बेला नै उनलाई ६ महिनासम्म खेलका क्रममा कुनै अभद्र व्यवहार गरे २५ हजार अमेरिकी डलर जरिवाना तिराउने र निश्चित अवधिका लागि खेलबाट निलम्बनसमेत गर्न सकिने चेतावनी दिइएको थियो । उनलाई ६ महिनाका लागि दिइएको चेतावनीको अवधि गत फेब्रुअरीमा सकिएको थियो ।
प्रतिक्रिया दिनुहोस !
