अफ्रिकी फिल्मकर्मी काठमाडौंमा

काठमाडौः करिब एक दर्जन अफ्रिकी फिल्मकर्मी तथा प्रोफेसरहरू काठमाडौं आइपुगेका छन् । उनीहरू कलेज अफ जर्नालिजम एन्ड मास कम्युनिकेसन ‘सीजेएमसी’को आयोजनामा हुन गइरहेको ‘नेपाल-अफ्रिका फिल्म फेस्टिवल’मा सहभागी हुन यहाँ आएका हुन् ।

‘पाँचौं नेपाल-अफ्रिका फिल्म फेस्टिवल-२०१६’ राजधानीको कमलपोखरीस्थित रसियन कल्चर सेन्टरमा सुरु हुँदैछ । आयोजक संस्था सीजीएमसीले सोमबार पत्रकार सम्मेलन गरी फेस्टिवलमा सहभागी फिल्मबारे जानकारी गराएको छ । यसपटक नेपाललगायत नौ मुलुकका फिल्म फेस्टिवलमा स्क्रिनिङ गराइँदैछ ।

फेस्टिवलमा सहभागी हुन नर्वेस्थित ओस्लो युनिभर्सिटीका प्रोफेसर क्रिस्टिना युगान्डा, हाई कमिसनका प्रथम सचिव ज्य्राँक मुटुंगी, तान्जानियाका फिल्म निर्देशक मार्टिन महान्दुलगायतका फिल्मकर्मी राजधानी आएका छन् ।

कार्यक्रममा बोल्दै तान्जानियाका फिल्म निर्देशक मार्टिनले भने, ‘अधिकांश अफ्रिकी मुलुक गृहयुद्धको चपेटाले गर्दा पछाडि परेका छन् । यसबाट फिल्म क्षेत्र पनि अछूतो छैन ।’ उनले ‘नेपाल-अफ्रिका फिल्म फेस्टिवल’ले संस्कृति तथा देशको भूगोलबारे जान्ने अवसर प्रदान गर्ने बताए । त्यस्तै प्रोफेसर ओस्लोले यस फेस्टिवलले अफ्रिका र नेपालको सांस्कृतिक सम्बन्ध दरिलो बनाउने विश्वास व्यक्त गरेकी थिइन् । उनले भनिन्, ‘नेपालजस्तो सानो तर सुन्दर मुलुकमा यो फेस्टिवल हुनु भनेको खुसी कुरा हो ।’

महोत्वसकी निर्देशक डा. मञ्जु मिश्रले यसपटक विगतका वर्षझैं फिचर, फिक्सन र डकुमेन्ट्री फिल्म सहभागी रहेको बताइन् । मंगलबारबाट तीन दिनसम्म चल्ने महोत्सवमा नेपालका नीर शाहद्वारा निर्देशित फिल्म ‘मसान’ले सहभागिता जनाउँदैछ ।

उपराष्ट्रपति नन्दकिशोर पुनद्वारा उद्घाटन हुने फेस्टिवलको पहिलो दिन डेमोक्रेटिक रिपब्लिक कंगोको फिल्म लुमुम्बा स्क्रिनिङ हुँदैछ भने नेपाली फिल्म मसान स्क्रिनिङसँगै महोत्सव समापन हुनेछ । फेस्टिवल उद्घाटनमा नेपाल र अफ्रिकाका विभिन्न मुलुकका प्रतिष्ठित फिल्म निर्देशकको उपस्थिति रहने डा. मि श्रले बताइन् ।

अफ्रिकी मुलुक गृहयुद्वको चपेटाले गर्दा पछाडि परेका छन् । यसबाट फिल्म क्षेत्र पनि अछुतो छैन । 

महोत्सवको दोस्रो दिन गिनिया बिसाउको ब्याटल अफ टोबाटो, बुर्किना फासोको तसुना, साउथ अफ्रिकाको फुल्स र डेनमार्कको मिनियाम्बा स्क्रिनिङ हुनेछ भने अन्तिम दिन इजिप्टको डोया एजिजा र अल्जेरियाको रचिडा स्क्रिनिङ हुनेछ ।

फेस्टिवलकी निर्देशक डा. मिश्रका अनुसार ती फिल्मले अफ्रिकाको भूराजनीति, जनजीवन, संस्कृति तथा परम्परा बुझ्न मद्दत गर्नेछन् । आयोजकका अनुसार फेस्टिवलमा सकारात्मक सन्देश दिने फिल्ममात्र प्रदर्शन गरिनेछ, जसले आमदर्शकमा सकारात्मक सोच विकास गराओस् ।

नेपाल र अफ्रिकाबीच सांस्कृतिक आदानप्रदान तथा सामाजिक विकासमा सहयोग पुर्‍याउने उद्देश्यले सन् २०११ देखि कलेजले नेपाल-अफ्रिका फिल्म फेस्टिवल आयोजना सुरु गरेको निर्देशक डा. मिश्रले बताइन् ।