यातायात कार्यालय भक्तपुरलाई लाइसेन्स वितरण गर्न भ्याईनभ्याई, ६ महिना लाग्ने

भक्तपुर : राधेराधेस्थित यातायात व्यवस्था कार्यालय, भक्तपुरलाई सवारी चालक अनुमति पत्र (लाइसेन्स) वितरण गर्न भ्याईनभ्याई भएको छ । वर्षौंदेखि बाँकी रहेको एक लाख ७५ हजार ५ सय ९८  लाइसेन्स एकै पटक प्राप्त भएपछि वितरणको काममा भ्याईनभ्याई भएको हो ।

सोमबारदेखि लाइसेन्स वितरण शुरु गरेपछि कार्यालयमा लाइसेन्स लिनेको लामो लाइन देख्न सकिन्छ । परीक्षा उत्तीर्ण गरेको ४ वर्षपछि लाइसेन्स आएपछि खुशी हुँदै कार्यालय आएकी रिता वाग्लेले बिहीवार दुई घण्टा लाइन बसेर लाइसेन्स लिएको बताइन् । सेवाग्राहीको लामो लाइनले कर्मचारीहरु दबाबमा देखिन्छन् ।

तथापी, विहान ९ बजेदेखि ५ बजेसम्म लाइसेन्स वितरण गर्दा पनि बिहीवारसम्म ३ हजार लाइसेन्स  मात्र वितरण भएको छ । यस्तै अवस्था रहे प्राप्त लाइसेन्स वितरणमै ६ महिना बढी लाग्ने कार्यालयका कर्मचारीहरु बताउँछन् । कार्यालयका निमित्त प्रमुख पवन कट्टेलले सीमित जनशक्तिका कारण पर्याप्त लाइसेन्स वितरण गर्न नसकेको प्रष्ट पारेका छन् ।

 कार्यालयले सवारी चालक अनुमति पत्रको लिखित परीक्षा, प्रयोगात्मक परीक्षा र नवीकरण लगायतको नियमित काम यथावत राखी लाइसेन्स वितरणको भार व्यहोर्नु परेको उनले बताए । ‘अन्य कामका लागि खटाउनु पर्ने कर्मचारी कटौती गरेर दैनिक १० जनालाई लाइसेन्स वितरणमा लगाइएको छ’, उनले भने । निमित्त प्रमुख कट्टेलले थप जशक्ति आवश्यक रहेको उल्लेख गरेका छन् । कार्यालय प्रमुख कट्टेलले अत्यावश्यक बाहेक लाइन बसेर लाइसेन्स नलिन जोड दिदै भीड कम भएपछि मात्र लाइसेन्स लिन आग्रह गरेका छन् ।

कार्यालयका सूचना अधिकारी जीवनकुमार बस्नेतले कार्यालयले ३ लाख ९२ हजार लाइसेन्स वितरण गर्नुपर्ने तथ्यांक प्रस्तुत गर्दै अझै लाइसेन्स छापिएर आउनेक्रम निरन्तर रहेको जानकारी गराए । कार्यालयका चार वटा कोठा लाइसेन्सले भरिएका र अब राख्ने ठाउँ समेत नभएको बस्नेतले बताए ।

संघीय सरकारले यातायात व्यवस्था कार्यविधि निर्देशिका संशोधन गरेर स्मार्ट लाइसेन्सको सट्टा क्युआर लाइसेन्स उपलब्ध गराउने निर्णय अनुसार लाइसेन्स छपाइले गति लिएको सूचना अधिकारी बस्नेतले बताएका छन् । प्राप्त लाइसेन्स न वर्णानुक्रम अनुसार आएको छ न त मिति अनुसार नै आएको उनले बताए । कार्यालयले एप्लिकेसन आइडी नम्बरको आधारमा पोकाबाट खोजेर लाइसेन्स वितरण गरिरहेको उनले बताएका छन् ।

बागमती प्रदेशको श्रम, रोजगार तथा यातायात मन्त्रालयको मातहत रहेको यातायात व्यवस्था कार्यालयमध्ये सबैभन्दा पहिला भक्तपुरको कार्यालयले लाइसेन्स वितरण शुरु गरे पनि मन्त्रालयले आवश्यक सहयोग नगरेको कर्मचारीहरुको गुनासो छ । थप जनशक्ति नपठाएकोमा उनीहरुले दुःखेसो पोखेका छन् । त्यति मात्र होइन, मुख्यमन्त्री तथा मन्त्रिपरिषदको कार्यालयले यातायात व्यवस्था सम्बन्धी सेवा प्रवाहको विषयमा बुधवार राखेको छलफलमा  यातायात व्यवस्था कार्यालय भक्तपुरलाई खबरै नगरेको विषयले कर्मचारीको मनोबल कमजोर बनेको एक कर्मचारीले बताए ।

‘अन्य कार्यालयमा शुरु हुन नसकेको लाइसेन्स वितरण भक्तपुरले शुरु ग¥यो’, उनले भने, ‘प्रोत्साहन पाउन भने सकिएको छैन ।’ यातायात व्यवस्था कार्यालय भक्तपुरमा मुख्यमन्त्री र प्रमुख  सचिवबीच टकरावका कारण  बागमती प्रदेश सरकारले कार्यालय प्रमुख खटाउन सकेको छैन । विगत तीन महिनादेखि निमित्त कार्यालय प्रमुखमा कार्यालय निर्भर छ । पछिल्लो समय सबैभन्दा पहिला लाइसेन्स वितरण गरेर निमित्त कार्यालय प्रमुख कट्टेलले आफ्नो नेतृत्व क्षमता प्रदर्शन गरिरहेका छन् । यद्यपी, प्रमुख नै आवश्यक हुने लाइसेन्सको नाम, थर र ठेगाना सच्याउने सेवा भने सञ्चालन हुन सकेको छैन ।