बागलुङ : बागलुङमा एक वर्षमा ७३ जना महिला लैंगिक हिंसाको सिकार भएको तथ्यांक सार्वजनिक भएको छ । हिंसा प्रभावितका लागि सञ्चालित अल्पकालीन महिला सेवा केन्द्र बागलुङको वार्षिक समीक्षाको क्रममा आर्थिक वर्ष २०८१/०८२ मा ७३ जना हिंसापीडितले केन्द्रमार्फत न्यायको खोजीमा आएको जनाइएको हो ।
अल्पकालीन सेवा केन्द्र बागलुङका सञ्चालक समितिकी सदस्य सचिव तथा बागलुङ नगरपालिका महिला बालबालिका शाखा प्रमुख रचना आचार्यले गत आवको तुलनामा न्याय खोज्न आउने पीडितको संख्या घटेको बताइन् । उनले पछिल्लो तीन वर्षमा पीडितको संख्या घट्दै गएको पनि जानकारी दिइन् । आचार्यका अनुसार आव २०७८/०७९ मा ९९ जना र २०८०/०८१ मा ९२ जना पीडित न्यायका लागि आएकामा यो वर्ष कम देखिएको हो । तीमध्ये शारीरिक हिंसाका नौजना, मानसिक हिंसाका १३ जना, आर्थिक हिंसाका आठजना, यौनजन्य हिंसाका १० जना र अन्य हिंसामा परेका ३३ जना छन् ।
केन्द्रमा सेवा लिन आएकामध्ये सबैभन्दा बढी ३६ जना दलित समुदायका छन् । अन्यको तुलनामा हिंसाको सिकार हुने दलित समुदायका महिला नै बढी देखिएका छन् । त्यसैगरी, जनजाति समुदायको १७ जना र अन्य समुदायबाट २० जना हिंसापीडितले सेवा केन्द्रबाट सेवा लिएको बागलुङ नगरपालिका महिला तथा बालबालिका शाखा प्रमुख एवं अल्पकालीन सेवा केन्द्र व्यवस्थापन समितिकी सदस्य सचिव आचार्यले जानकारी दिइन् ।
सेवा लिन आउनेहरूमध्ये केही जिल्ला प्रहरी कार्यालय र धौलागिरि अस्पतालमा सञ्चालित एकद्वार संकट व्यवस्थापन केन्द्रमार्फत सेवा केन्द्रमा आउँछन् भने कतिपय सिधै केन्द्रमा आउने गरेका छन् । चालु आर्थिक वर्षमा १८ जना जिल्ला प्रहरी कार्यालयबाट सेवा केन्द्रमा पठाइएका छन् भने ५४ जना सिधै सेवा केन्द्रको सम्पर्कमा आएको सदस्य सचिव आचार्यले बताए । एकजना अन्य माध्यमबाट सेवा केन्द्रसम्म आइपुगेका छन् ।
सेवा केन्द्र बागलुङ नगरपालिकामा सञ्चालित भए पनि यसले जिल्लाभर र जिल्लाबाहिरका समेतलाई सेवा दिइरहेको आचार्यको भनाइ छ । चालु आर्थिक वर्षमा सेवा लिएकामध्ये २५ जना बागलुङ नगरपालिकाका छन् भने अन्य सेवाग्राही जिल्लाको विभिन्न पालिकाका छन् । जैमिनी नगरपालिकाका आठ, गलकोट नगरपालिकाका ६, ढोरपाटन नगरपालिकाका पाँच, काठेखोला गाउँपालिका पाँच, बडिगाड गाउँपालिकाका तीन, ताराखोला गाउँपालिकाका एक, तमानखोला गाउँपालिकाका चार, निसीखोला गाउँपालिकाका दुई, बरेङ गाउँपालिकाका चार र जिल्लाबाहिरका नौ जनाले अल्पकालीन सेवा केन्द्रबाट सेवा लिएका छन् ।
अल्पकालीन सेवा केन्द्र सञ्चालनसम्बन्धी सरोकारवालाको छलफल तथा अन्तक्र्रिया कार्यक्रममा सहभागीले तथ्यांकमा घरेलु हिंसा घटे पनि समाजमा बढेको बताए । सहभागीहरूले तथ्यांकमा घट्दो देखिए पनि समाजमा जाँदा हिंसाका घटनाहरू बढ्दो देखिएको र सामाजिक असुरक्षाका कारण यस खालका घटना बाहिर आउन नसकेको बताएका थिए ।
जिल्ला समन्वय समिति बागलुङका प्रमुख अमरबहादुर थापाले हिंसाका घटना समाजमा लुकेका र लुकाइएका अवस्थामा रहेको हुन सक्ने बताए । उनले पीडितहरूले न्यायकर्ताहरू माथि विश्वास नगरेको कारण हिंसाका घटनाहरू बाहिर आउन नसकेको बताउँदै न्याय दिलाउने विश्वास दिलाउनुपर्ने बताए । स्थानीय तहले बनाएको संरचनाप्रति नागरिकको विश्वास र जनचेतना जगाउने काममा लाग्नुपर्ने थापाको भनाइ छ ।
प्रतिक्रिया दिनुहोस !
