सेयर बजारमा गिरावट जारी : परिसूचक २५ सय विन्दुमा झर्यो, कारोबार ५ अर्बमा सीमित
असोज २, २०८१ बुधबार १५:२७:५९
काठमाडौं : सेयर बजार ओरालो लाग्ने क्रम आज पनि जारी रह्यो। साताको पहिलो कारोबार दिन आइतबारदेखि ओरालो यात्रा तय गरेको नेप्सेले आज पनि सोही यात्रालाई निरन्तरता दिएको हो।
आइतबार ५० अंकले घटेको नेप्से सोमबार ५७ अंकले घटेर बन्द भएको थियो। मंगलबार उपत्यकामा सार्वजनिक बिदा परेकाले कारोबार भएन।
यसदिन नेप्से परिसूचक ४ अंकले घटेर २५७६.७६ विन्दुमा अडिएको छ। नेप्से घटेसँगै कारोबार रकम पनि घटेको छ। आज ३२० स्क्रिप्सको १ करोड ३९ लाख ५२ हजार १२१ कित्ता सेयर ५ अर्ब ६६ करोड ९१ लाख ९४ हजार ९६१ रुपैयाँमा खरिदबिक्री भए।
सोमबार ७ अर्ब ३६ करोड रुपैयाँको कारोबार भएकोमा आइतबार १० अर्ब ३३ करोड मूल्य बराबरको कारोबार भएको थियो। एकल अंकले ओरालो लागेको सेयर बजारमा कुनै पनि कम्पनीको सेयर सकारात्मक सर्किट लेभलमा कारोबार भएन। कालिका लघुवित्त वित्तीय संस्थाको सेयर सर्वाधिक ८.०८ प्रतिशतले बढ्यो।
यसैगरी स्वरोजगार लघुवित्त वित्तीय संस्था,रावा इनर्जी डेभलपमेन्ट,भूगोल डेभलपमेन्ट कम्पनीको सेयर ७/७ प्रतिशतले बढ्दा सुपर माइ हाइड्रोपावरको सेयर ६.०२ प्रतिशतले बढ्यो। कारोबार रकमका आधारमा सीईडीबी हाइड्रोपावर डेभलपमेन्ट कम्पनी शीर्षस्थानमा रह्यो। सो कम्पनीको २० अर्ब ८ लाख मूल्य बराबरको सेयर कारोबार भयो।
नेपाल फाइनान्सको १६ अर्ब बराबरको सेयर कारोबार हुँदा एनएलजी इन्स्योरेन्सको १५ करोड,साहास ऊर्जाको १३ करोड र गुडविल फाइनान्सको १२ करोड मूल्य बराबरको सेयर कारोबार भयो।
दुई समूहको उपसूचकबाहेक अन्यको उपसूचक नकारात्मक देखिएका छन्। बैंकिङ र नन लाइफ इन्स्योरेन्स समूहको उपसूचक बढ्दा अन्यको घटेको हो।
यसदिन कारोबारमा आएका स्टक्समध्ये ७४ वटाको मूल्य बढ्दा १६३ वटाको घट्यो भने ७ वटाको मूल्य स्थिर रह्यो।
प्रतिक्रिया दिनुहोस !
