काठमाडौं विश्वविद्यालय र बीवाइडीको सहकार्यमा चार्जिङ स्टेशनको शुभारम्भ

काठमाडौं : काठमाडौं विश्वविद्यालय (केयू) र साइमेक्स इंक प्रा.लि बीवाइडीले धुलिखेलमा ३३ किलोवाटको डीसी फास्ट चार्जिङ स्टेसनको शुभारम्भ गरेका छन् । केयूका उपकुलपति प्रा.डा भोला थापा र बीवाइडीको एसिया–प्यासिफिक अटो सेल्स डिभिजनका महाप्रबन्धक लिउ ज्युलियाङले संयुक्तरूपमा उद्घाटन गर्दै दिगो विकासको प्रवद्र्धनमा ठूलो कदम चालेको बताएका छन् । 

बीवाइडीले चार्जिङ स्टेशनबाहेक अनुसन्धान र शिक्षण गतिविधिहरूको लागि इलेक्ट्रिक सवारी साधनहरूको कम्पोनेन्टहरू प्रदान गरेको छ । यी कम्पोनेन्टहरू केयूमा प्रयोगशालाको सेटअपमा महत्वपूर्ण हुने केयूले जनाएको छ । विद्यार्थी र अनुसन्धानकर्ताहरूलाई आधुनिक ईभी प्रविधिहरूसँग प्रत्यक्षरूपमा सहभागी हुन सहयोग मिल्ने लिउ जुलियाङले बताए । 

‘हाम्रो लक्ष्य पृथ्वीलाई १ डिग्री सेल्सियसमा चिसो बनाउन मद्धत गर्नु हो । यस प्रकारको साझेदारीमार्फत हामी विश्वमा वातावरणमैत्री सवारी साधनको विकास र दिगो विकासको प्रवद्र्धनमा शिक्षा क्षेत्रको महत्वपूर्ण जिम्मेवारी छ,’ लिउ जुलियाङले भने । 

उनले बीवाइडीले प्रभावकार रूपमा कार्बन उत्सर्जनको मुद्दालाई सम्बोधन गरेको दाबी गरे । ‘काठमाडौं विश्वविद्यालय हाम्रो साझेदार हो । हामी विद्यार्थीहरूलाई व्यावहारिक अनुभव र विकसित इलेक्ट्रिक कारमा नवीनतम प्रविधिहरूको प्रयोग गर्न चाहन्छौं,’ उनले भने।

केयूले बीवाइडीको उद्योग, ज्ञान र अनुभवबाट विद्यार्थीहरू धेरै लाभाञ्वित हुने अपेक्षा गरेको छ । काठमाडौं विश्वविद्यालयका उपकूलपति प्रा.डा थापाले बीवाइडीसँगको सहकार्यले शैक्षिक पाठ्यक्रममा दिगो ऊर्जा समाधानहरू समावेश गर्ने दिशामा एक प्रमुख कदम भएको बताए । 

केयूका प्राज्ञिक औद्योगिक सहकार्य विभागका संयोजक डा. राम लामाले पनि यो साझेदारीको भविष्यबारे आफ्नो धाराण राखेका थिए । ‘यो योजनामा ईभीको प्राविधिक प्रयोगशालाका साथै एक ईभी अनुसन्धान र विकास केन्द्र स्थापना गरिनेछ । बीवाइडीको प्राविधिक र उपकरण सहयोगमा काठमाडौं विश्वविद्यालयमा यो विद्युतीय सवारी साधनको विकासमा मात्रै नभई आउने पुस्ताका लागि विश्वलाई राम्रो ठाउँ बनाउन पनि एउटा कदम हुनेछ,’ डा. लामाले भने।