अन्नपूर्ण पोस्ट्का बैतडी संवाददाता कृष्ण विष्ट दुर्घटनास्थल गए, तस्बिर खिचे । फर्किएपछि मात्र थाहा भयो– पहिचान खुल्न नसक्ने गरी निधन भएका आफ्नै बुवा रहेछन् ।
धनगढी : कृष्ण विष्ट अन्नपूर्ण पोस्ट् र र एपीवान टेलिभिजनका बैतडी संवाददाता हुन् । उनी बैतडीको सूचनामा दक्खल राख्ने पत्रकार पनि हुन् । स्थानीय सेभेन स्टार रेडियोमा उनी समाचार प्रमुख हुन् । रेडियोको बिहानको समाचार तयार पार्ने र वाचन गर्ने ड्युटी उनकै हुन्छ ।
शुक्रबार एकाबिहानै उनी रेडियोमा पुगे । खोडपेबाट बझाङ जाने सडकमा ट्याक्टर दुर्घटनामा २ जनाको मृत्यु भएको खबर आयो । उनले प्रहरीसँग त्यसको सम्पूर्ण विवरण मागे । प्रहरीले ट्याक्टर दुर्घटनाको सबै जानकारी दियो । प्रहरीले दिएको सूचनामा ट्याक्टर चालक राजेश चौधरी र एक जना सनाखत हुन नसकेको व्यक्तिको मृत्युको खबर उनले आफैं लेखे पनि ।
त्यो खबर आफ्नै रेडियोमा पढे । अन्नपूर्ण पोस्ट्को अनलाइनमा पनि पठाए । एपीवान टेलिभिजनको जिल्ला ब्युरोको फेसबुक ग्रुपमा उनले उपलब्ध फोटो भिडियो पठाए । समाचार अनलाइनमा प्रकाशन भयो । एपीवान टेलिभिजनमा पनि प्रसारण भयो । तर कृष्णको पत्रकारिताको सक्रियता त्यत्तिमै सकिएन । उनले घटनास्थल जाने निधो गरे ।
उनले घटनास्थल गएर त्यहाँको फोटो भिडियो खिच्ने निधो गरे । घटनाको प्रारम्भिक खबर सबैतिर फैलिसकेको थियो । उनले घटनाको फोटो, भिडियो र विस्तृत विवरणका लागि मोटरसाइकल समाते । र, घटनास्थलतिर लम्किए ।
उनी घटनास्थल नजिकैको खोडपे बजारमा बस्छन् । उनले काम गर्ने स्थानीय रेडियोको कार्यालय पनि खोडपे बजारमै छ । खोडपेबाट झन्डै ६÷७ किलोमिटरको दूरीमा रहेको दुर्घटनास्थल झौलेक मोडमा उनी पुुगे ।
उनले दुर्घटनाग्रस्त ट्याक्टरको तस्बिर खिचे । चालक र नजिकैको रुखमा अँगालो हालेर रक्ताम्य भएका सनाखत हुन नसकेको भनिएका व्यक्तिको पनि उनले तस्बिर खिचे । दुर्घटनामा घाइते भएकाले उनले गुहार माग्दै रुखलाई अँगालो हालेको अनुमान गर्न सकिन्छ । घटनास्थल रक्ताम्मे थियो । कम्मर र पेटमा गहिरो चोट लागेको थियो । सायद उनी खसिसकेपछि ट्याक्टर उनीमाथि बज्रिएको हुनुपर्छ । त्यो रक्ताम्य शरीर बुवाको हुन सक्ने भनेर कृष्णले कल्पनासमेत गरेका थिएनन् । किनकि उनका बुवा काठको ठेक्कापट्टाको काम गर्छन् । बुवा केही दिनदेखि त्यही काममा व्यस्त थिए । घर आउने पक्की सडकमा दुर्घटना भएको थियो । बुवाले घर आउँदै गरेको खबर पनि परिवारलाई गरेका थिएनन् ।
कृष्ण तस्बिर खिचेर झन्डै दुई सय मिटर तल रहेको खोलाबाट माथि सडकमा उक्लिए । उक्त ट्याक्टर सुर्नयाबाट खोडपेतिर आइरहेको थियो ।
कृष्णसँगै रहेका प्रहरीले ट्याक्टरमा ज्यापुबाट को चढेको थियो भन्ने सोधी खोजी गरे । जब पत्ता लाग्यो, उनी बेहोस भए । सनाखत हुन नसकेका ट्याक्टरका यात्रु कृष्णकै बुवा मन्धीर विष्ट (नागरिकताको नाम मानबहादुर विष्ट) रहेछन् ।
दुर्घटनामा निधन भएका आफ्नै बुवाको तस्बिर खिचे तर अनुहार छोपिएको कारण चिन्न सकेनन् उनले । सडकमा आइसकेपछि मात्र त्यो तस्बिर बुवाको नै रहेको थाहा पाए ।
घटनास्थलमा रहेका अर्का पत्रकार सीपी लोहिया भन्छन्, ‘आफैंले रिपोर्टिङ गरेर सडकमा आएपछि सनाखत हुन नसकेका व्यक्ति बुवा हुन् भन्ने उनलाई थाहा भयो । अनि उनी (कृष्ण) सडकमै ढले । सम्हाल्न गाह्रो भइरहेको छ ।’
कृष्णका बुवाको उमेर ५२ वर्षमात्रै हो । उनी खोडपे आसपासको वन र सामुदायिक वनमा काठको काम गर्छन् । कहिले घर त कहिले वनतिर हुने भएकाले घर आउने जाने उनको ठेगान नै हुँदैनथियो । ‘घर आउने खबर गरेको भए सायद दुर्घटनाको जानकारी राति नै आउने थियो कि ? खोजबिन गर्दा घाइते भएका बुवा बचाउन सकिन्थ्यो कि ?’ पत्रकार लोहियाले भने, ‘पत्रकार आफैंले बुवाको शवको रिपोर्टिङ गरे ।’
दुर्घटना भएको ठाउँ एकदमै साँघुरो छ । दुर्घटनास्थल नजिकको भित्तातिर गाडी घस्रिएको निसान रहेको प्रत्यक्षदर्शीले बताएका छन् । प्रहरीले पनि कुनै गाडीलाई साइड दिने बेलामा किनारातिर रहेको ट्याक्टर खसेको अनुमान लगाएको छ ।
सुर्नयाबाट खोडपे गइरहेको से२त ३६७८ नम्बरको ट्याक्टर बिहीबार राति ११ बजेतिर जयपृथ्वीसिंह राजमार्गको पाटन नगरपालिका– ८ झौलेक मोडमा दुर्घटना भएको थियो ।
प्रतिक्रिया दिनुहोस !
