सहकारी समस्या समाधान गर्न सरकार तयार, प्रधानमन्त्रीले अर्थमन्त्रीलाई भने- ठोस प्रस्ताव ल्याउनुस्

काठमाडौं : प्रधानमन्त्री पुष्पकमल दाहालले सहकारीको समस्या सम्बोधन नहुँदा लाखौं निक्षेपकर्ताहरू पीडित भएको बताएका छन्। उनले सहकारीबाट पीडित भएकाहरूको समस्याको समाधान गर्नेगरी ठोस प्रस्ताव ल्याउन अर्थ मन्त्रालयलाई निर्देशन दिएका छन्। सोमबार दिउँसो सिंहदरबारमा आयोजित छलफलमा प्रधानमन्त्रीले यस्तो निर्देशन दिएका हुन्।

'सहकारीको समस्या छिटो समस्या नगर्दा लाखौं निक्षेपकर्ता प्रताडित भएका छन्। उनीहरू घर न घाट भएका छन्। उनीहरूको समस्या कसरी सम्बोधन गर्ने? त्यसबारे ठोस प्रस्ताव बनाएर ल्याउनुस्,' उनले भने।

बैठकमा अर्थमन्त्री डा. प्रकाशशरण महतले सहकारीको निश्चित सिलिङभन्दा माथिको नियमन नेपाल राष्ट्र बैंकले गर्नेगरि निर्णय गरेर जानुपर्ने बताए। बैठकमा मुख्यसचिव डा. बैकुण्ठ अर्यालले सहकारीको समस्या सम्बोधन गर्न सहकारीको नियमन गर्न निक्षेप कोषको कानुनी प्रबन्धलाई व्यवहारिक रूप दिन आवश्यक रहेको बताए।