काठमाडौं : नेकपा एमालेका अध्यक्ष केपी शर्मा ओलीले चिकित्सकमाथि भइरहेका दुर्व्यवहार बन्द गर्न आग्रह गरेका छन्। उपत्यकालगायत विभिन्न जिल्लामा चिकित्सकमाथि दुर्व्यवहार भइरहेको घटना सार्वजनिक भएपछि अध्यक्ष ओलीले यस्तो आग्रह गरेका हुन्।
बुधबार सामाजिक सञ्जालमा लेख्दै ओलीले चिकित्सकलाई सम्मान र सहयोग गर्नुपर्न बताएका छन्।
'मेरो जीवनमा डाक्टरको ठूलो भूमिका छ। डाक्टरको महत्त्व म स्वयंले आफ्नो जीवनमा महशुस गरेको छु। आजभोलि उपचार गरिरहेका डाक्टरहरूलाई हातपात र दुर्व्यवहार भएका समाचार सामाजिक सञ्जालमा देखेको छु। मेरो अनुरोध छ -डाक्टरहरु प्रतिको दुर्व्यवहार बन्द गरौं । सम्मान र हार्दिकता विकास गरौं ,'उनले सामाजिक सञ्जालमा लेखेका छन्।
पोखराको मणिपाल शिक्षण अस्पताललगायतका स्थानमा चिकित्सकमाथि आक्रमण भएपछि सुरक्षाको माग गर्दै चिकित्सकहरू आन्दोलित भएका छन्। स्वास्थ्यकर्मीमाथि कुटपिट भएको घटनालाई लिएर आज पोखराका अस्पतालमा आकस्मिक बाहेकका सबै सेवा बन्द गरिएको छ ।
सुरक्षाको माग गर्दै चिकित्सकहरूले काठमाडौंको माइतीघर मण्डलामा आज पनि विरोध जनाएका छन्। चिकित्सकमाथि आक्रमण गर्नेहरूमाथि कारबाही नगरेसम्म काममा नफर्कने उनीहरूले चेतावनी समेत दिएका छन्।
प्रतिक्रिया दिनुहोस !
