बागलुङ : बागलुङका स्थानीय तहको बजेट ८ करोडले घटेको छ । बागलुङका १० स्थानीय तहका लागि संघीय सरकारले आगमी वर्षका लागि ८ करोड ४५ लाख बजेट घटाएको हो।
चालु आर्थिक वर्षको तुलनामा आगामी आर्थिक वर्ष २०८०/०८१ का लागि पाँच पालिकाको बजेट घटाएको हो भने पाँच पालिकामा बजेट बढेको छ । जिल्लाको बागलुङ नगरपालिका, जैमिनी नगरपालिका, ढोरपाटन नगरपालिका, काठेखोला गाउँपालिका र बडिगाड गाउँपालिकाको बजेट बढेको छभने गलकोट नगरपालिका, निसीखोला गाउँपालिका, बरेङ गाउँपालिका, ताराखोला गाउँपालिका र तमानखोला गाउँपालिकाको बजेट घटेर आउने भएको हो ।
आगामी आर्थिक वर्षका लागि संघीय सरकारबाट वित्तीय समानीकरण, सशर्त, विशेष र समपूरक अनुदान गरी चार अर्ब २६ करोड ३६ लाख बजेट विनियोजन गरेको छ । जुन चालू आवको तुलनामा ८ करोड ४५ लाख कम हो ।
जिल्लाका ४ नगरपालिका र ६ गाउँपालिकालाई संघीय सरकारले आर्थिक वर्ष २०८०/०८१ का लागि बजेटको बाँडफाँट गर्दा चालू आवको तुलनामा आगामी आवको बजेट घटाइएको हो । सङ्घीय मात्रै हैन प्रदेशको बजेटसमेत चालू वर्षको तुलनामा घटेर आउने देखिन्छ ।
चालू आवका लागि सङ्घीय सरकारबाट यहाँका दश स्थानीय तहलाई चार अर्ब ३४ करोड ८१ लाख बजेट प्राप्त भएको थियो । बागलुङमा सबैभन्दा बढी बागलुङ नगरपालिकामा ५ करोड १ लाख बजेट चालुको तुलनामा बढेर आएको अर्थ मन्त्रालयले जनाएको छ ।
उक्त नगरलाई आगामी आवका लागि ९० करोड २६ लाख बजेट विनियोजन गरिएको हो । बागलुङमा चालू आवमा सङ्घीय सरकारको बजेट ८५ करोड २५ लाख बजेट प्राप्त भएको थियो । यस्तै जैमिनी नगरपालिकामा आगामी आवका लागि ५३ करोड ४७ लाख बजेट विनियोजित भएको छ । उक्त नगरमा चालु आवमा संघीय सरकारबाट ५२ करोड २५ लाख विनियोजित भएको थियो । जुन गतवर्षको तुलनामा १ करोड २२ लाख बढी हो ।
यस्तै ढोरपाटन नगरपालिकाको बजेट समेत बढेर आएको छ । उक्त नगरमा चालू आवका लागि ३७ करोड २८ लाख बजेट विनियोजित भएको छ । चालु आवमा सोही पालिकामा ३७ करोड एक लाख विनियोजित भएको थियो । जुन गतवर्षको तुलनामा २७ लाख रकम बढी हो ।
नगरपालिका तर्फ गलकोट नगरपालिकाको बजेट घटेको छ । उक्त नगरमा आगामी आवका लागि ४९ करोड ५८ लाख बजेट विनियोजित भएको छ । चालु आवमा ५१ करोड एक लाख बजेट विनियोजत भएको थियो । चालु आवको तुलनामा गलकोटको बजेट १ करोड ४३ लाख बजेट घटेर आएको हो ।
यसैगरी, काठेखोला गाउँपालिकामा चालु आवको तुलनामा २ करोड २८ लाख रुपैयाँ बजेट वृद्धि भएर आएको छ । काठेखोलामा आगामी आवको लागि ४२ करोड ४ लाख रुपैयाँ विनियोजित भएको छभने चालु आवमा ३९ करोड ७६ लाख रुपैयाँ विनियोजित भएको थियो ।
यस्तै,बडिगाड गाउँपालिकालाई आगामी वर्षका लागि ४८ करोड ५४ लाख बजेट विनियोजन भएको छ । यसलाई चालू आवमा ४८ करोड चार लाख बजेट बिनियोजन भएको थियो । चालू आवको तुलनामा उक्त गाउँपालिकाको आगामी बजेट ५३ लाख बजेट बढेको हो ।
यस्तै,निसीखोला गाउँपालिकालाई आगामी आवमा ३० करोड ६७ लाख बजेट विनियोजन भएको छ । यहाँ चालू आवमा ३३ करोड १२ लाख बजेट आएको थियो । चालूको तुलनामा आगामी वर्षको बजेटमा दु्ई करोड ४५ लाख बजेट घटेर आउने भएको छ ।
यसैगरी बरेङ गाउँपालिकालाई आगामी वर्षका लागि २८ करोड ९७ लाख बजेट प्राप्त हुने भएको छ । उक्त पालिकाको चालू आवमा ३० करोड पाँच लाख बजेट प्राप्त भएको थियो । चालू आवको तुलनामा आगामी वर्ष यस गाउँपालिकाको बजेट एक करोड आठ लाख बजेट घटेको छ ।
ताराखोला गाउँपालिकालाई आगामी वर्षको लागि २५ करोड १८ लाख बजेट प्राप्त हुने भएको छ । उक्त पालिकाको चालू आवमा २६ करोड ४३ लाख बजेट प्राप्त भएको थियो । चालू आवको तुलनामा आगामी वर्ष यस गाउँपालिकाको बजेट एक करोड २६ लाख बजेट घटेको छ ।
यस्तै, तमानखोला गाउँपालिकाको लागि २० करोड ३७ लाख बजेट विनियोजित भएको छ । सोही पालिकामा चालु आवको लागि २१ करोड ९० लाख बजेट विनियोजित भएको थियो । तमानखोलामा चालु आवको तुलनामा आगामी वर्षको लागि १ करोड ५३ लाख रुपैयाँ बजेट घटेर आउने भएको छ ।
संघीय सरकारले सशर्त, विशेष अनुदान, सपपूरक अनुदान, राजश्व बाँडफाँटलगायत शीर्षकमा स्थानीय तहलाई अनुदान दिने गरेको छ । प्रदेश सरकारले दिने अनुदान, सङ्घीय अनुदान र स्थानीय स्रोतसमेत समावेश गरेर स्थानीय तहले बजेट बनाउने गरेका छन् ।
सङ्घीय सरकारको बजेट आएसँगै बागलुङका स्थानीय तहले धमाधम नीति तथा कार्यक्रम र बजेट बनाउने काम थालेका छन् ।
प्रतिक्रिया दिनुहोस !
