ढोरपाटनमा १२ नाउर र नौं झारलको शिकार हुँदै

बागलुङ : नेपालकै एक मात्र शिकार आरक्षमा यस वर्षको दोस्रो याममा १२ नाउर र नौं झारलको शिकार हुने भएको छ । बोलपत्र प्रक्रियाबाट छानिएका सात कम्पनीले पेशेवर विदेशी शिकारीलाई आरक्षमा शिकार गराउने भएका हुन् । 

यस वर्षको दोस्रो याम (फागुन–बैशाख)को लागि सात कम्पनीबाट आठ देशका शिकारीहरुले शिकार गर्न लागेको ढोरपाटन शिकार आरक्षका प्रमुख संरक्षण अधिकृत विरेन्द्र कंडेलले बताए ।

अधिकृत कंडेलले नेपाल वाईल्ड लाईफ एडभेन्चर, सफारी आउट्फिटरस काठमाडौंबाट युएसएका शिकारीले फागुनेमा १ नाउर र १ झारल, श्री हिमालयन वाईल्डफाईफ आउटफिटर्स काठमाडौंबाट युएसएका शिकारीले बार्सेमा १ नाउरको शिकार गर्ने बताए ।

यस्तै श्री टयाक्स एन ट्रेल्स प्रा.लि. काठमाडौंबाट क्यानडाका शिकारीले गुस्तुङमा १ नाउर र १ झारलको शिकार गर्ने भएका छन् भने श्री ग्लोबल सफारिज नेपाल प्रा.लि. काठमाडौंबाट हंगेरीका शिकारीले गुस्तुङ (रुकुम पूर्व)मा १ नाउर र १ झारल तथा फ्रान्सका शिकारीले सुनदह (रुकुम पूर्व)मा १ नाउ र १ झारलको शिकार गर्ने अनुमति पाएको अधिकृत कंडेलले बताए ।

यस्तै यस वर्ष श्री ओपन नेपाल वाईल्डलाईफ सफारी एण्ड ट्रेक्स प्रा.लि. काठमाडौंबाट पोर्चुगलका शिकारीले सुनदहमा १ नाउर, श्री नेपाल ट्राभल एक्पेडिसन प्रा.लि. ललितपुरबाट पोल्याडका शिकारीले दोगाडीमा १ नाउर, रसियन शिकारीले दोगाडीमा १ नाउर र गुस्तुङमा १ झारल, स्पेनिस शिकारीले वार्सेमा १ नाउर र गुस्तुङमा १ झारल र श्री हिमालयन सफारिस प्रा.लि. काठमाडौंबाट तीन जना अमेरीकाका शिकारीहरुले शिकार गर्ने भएका छन् । उनीहरुले दोगाडीमा १ नाउर र सेङमा १ झारल, सेङमा १ नाउर र सुनदहमा १ झारल, दोगाडीमा १ नाउर र गुस्तुङमा १ झारलको शिकार गर्ने अधिकृत कंडेलले  बताए ।

शिकार गर्नको लागि २ जना शिकारीहरु ढोरपाटन आइपुगेको अधिकृत कंडेलले बताए । उनले श्री ओपन नेपाल वाईल्डलाईफ सफारी एण्ड ट्रेक्स प्रा.लि. काठमाडौं कम्पनीबाट सुनदहमा १ वटा नाउरको शिकारको लागि पोर्चुगलका शिकारी ओलिभा डे एन्ड्राडे भिलारिन्हो जोस मिगुएल र श्री हिमालयन वाईल्डलाईफ आउटफिटर्स, स्युचाटार काठमाडौंबाट बार्सेमा १ नाउरको शिकारको लागि युएसएका चार्ल्स हेरोल्ड वेकल आरक्ष आइपुगेको बताए । अन्य शिकारीहरु आउने क्रम रहेको अधिकृत कंडेलले बताए ।

विभागले अघिल्लो (फागुन) महिना शिकारका लागि पेशेवर शिकारी अनुज्ञापत्र प्राप्त कम्पनीबाट शिलबन्दी दरभाउपत्र आव्हान गरेको थियो । यस पटक शिकारीहरुले एउटा नाउरको ५ लाख २० हजारदेखि ७ लाख ८० हजारसम्म र झारलको ३ लाखदेखि ३ लाख १० हजार रुपैयाँसम्म राजश्व तिरेको अधिकृत कंडेलले बताए । अघिल्लो (पहिलो) याम (असोज–मङ्सिर) मा एउटा नाउरको २० लाख पाँच हजार र झारलको ६ लाख रुपैयाँ राजश्व बुझाइएको थियो । शिकारको माग बढी हुँदा राजस्वको दर पनि बढ्ने र माग घट्दा राजस्व पनि घट्ने गरेको छ । यस वर्षको पहिलो सिजनमा आठ नाउर र छ झारलको शिकार कोटा निर्धारण गरिएपनि सात नाउर र पाँच झारलको मात्र शिकार भएको थियो ।

व्यवस्थित शिकारका लागि यस पटक छ क्षेत्र तोकिएको अधिकृत कंडेलले जानकारी दिए । उनले शिकारीले रोजेको ठाउँमा कम्पनीले शिकार गराउने गरेको बताए । ‘आवश्यक प्रक्रिया पूरा गरी शिकारीहरु ढोरपाटन आउने क्रम जारी छ,’ अधिकृत कंडेलले भने,‘यो याममा १२ नाउर र नौं झारलको शिकार कोटा छ । सोही अनुसार बैशाखसम्म शिकारीहरुले शिकार गर्नेछन् ।’ चैतको पहिलो सातादेखि शिकार खेल्न शुरु भएको छ ।

शिकारी हेलिकप्टरबाट आरक्षमा पुग्ने गर्छन् । खर्चिला र साहसी शिकारीले विकटमा रहेका ‘ब्लक’ मा शिकार खेल्न रुची राख्छन् । शिकारी, आरक्ष कार्यालय तथा कम्पनीका प्रतिनिधि, भरिया र पथप्रदर्शकसहितको टोलीले १५ दिन आरक्षमा बिताउँछन् ।

आरक्षणमा बर्सेनि असोज–मङ्सिर र फागुन–वैशाख गरी दुई पटक शिकार खुल्छ । राष्ट्रिय निकुञ्ज तथा वन्यजन्तु संरक्षण विभागले हरेक शिकार याममा विद्युतिय बोलपत्र आह्वान गरेर शिकारको कोटा र राजश्व दर निर्धारण गर्छ । साहसिक यात्रा र रोमाञ्चक शिकार अनुभवका लागि ढोरपाटन विदेशीको आकर्षक गन्तव्य बनेको छ ।

आरक्षमा व्यवस्थित शिकारको व्यवस्था मिलाइएको कारण राष्ट्रले विदेशी मुद्रा आर्जन गर्न पाएको अधिकृत कंडेलले भनाइ छ । बागलुङ, रुकुम र म्याग्दी जिल्लाका केही भागमा यो शिकार आरक्ष फैलिएको छ । राष्ट्रिय निकुञ्ज तथा वन्यजन्तु संरक्षण विभागले समय समयमा शिकार गरिने मुख्य वन्यजन्तु नाउर र झारलको गणना तथा अनुगमन गरी वार्षिक कोटा निर्धारण गरी प्रतिस्पर्धाको आधारमा शिकार गराउने गर्छ । विं सं. २०४४ सालमा स्थापना भएको आरक्ष एक हजार ३२५ वर्ग किलोमिटर क्षेत्रफलमा फैलिएको छ ।