जनकपुरधाम : मधेश प्रदेशको राजधानी जनकपुरधाममा मेयरका स्वतन्त्र उम्मेदवार मनोज साहको जित सुनिश्चित भएको छ ।
२५ वडा रहेको उपमहानगरपालिकामा पाँचदलीय गठबन्धनबाट जनता समाजवादी पार्टीका लालकिशोर साह चौथो स्थानमा छन् भने दोस्रोमा नेकपा एमालेका शिवशंकर साह हिरा रहेका छन् । कांग्रेससहितको गठबन्धनबाट उम्मेदवार बनेका साह निवर्तमान मेयर समेत हुन् ।
पछिल्लो मतगणनाअनुसार मनोजले १२ हजार २८३ मत प्राप्त गरेका छन् भने उनलाई नेकपा एमालेका शिवशंकर साहले ९ हजार ३०३ मत ल्याएर पछ्याइरहेका छन् ।
२५ वटा वडा रहेको उपमहानगरपालिकामा २३ वटा वडाको मतगणना सम्पन्न भइसकेको छ । हाल वडा नम्बर १५ को मतगणना जारी रहँदा मनोज ३ हजार मतले अगाडि छन् ।
उपमेयरतर्फ गठबन्धनको तर्फबाट कांग्रेसका उम्मेदवार किशोरी साह १४ हजार ८३२ मत ल्याएर जितको नजिक छन् ।
पछिल्लो साढे चारवर्षदेखि जनकपुरको नगरप्रमुख पदका लागि तयारीमा जुटेका मनोजकुमार साहलाई नेपाली कांग्रेसको नगर कमिटी र जिल्ला कमिटीले समेत उम्मेदवारको रुपमा सिफारिस गरेको थियो । तर, पाँचदलीय गठबन्धनले जसपालाई मेयर दिने निधो गरेपछि उनले ३४ वर्षीय कांग्रेसको यात्रालाई तिलाञ्जली दिँदै पार्टीबाट राजीनामा दिएका थिए ।
पार्टीको परित्याग गरी स्वतन्त्र उम्मेदवारी दिएका साहको पक्षमा जनकपुरवासी उभिए । घण्टाघर चिन्हबाट उम्मेदवारी दिएका साहले जनताको जनमत पाएका छन् ।
२०७४ सालको स्थानीय तह निर्वाचनमा उनी नेपाली कांग्रेसबाट मेयर पदका प्रत्यासी थिए । सो बेला राष्ट्रिय जनता पार्टी नेपालबाट लाल किशोर साहले ११ हजार ६३८ मत बढी ल्याएर साहलाई चुनाव हराएका थिए ।
लालकिशोरले २२ हजार २७७ मत ल्याउँदा मनोजले १० हजार ६३९ मत प्राप्त गरेका थिए । मनोज सो बेला दोस्रो स्थानमा थिए ।
एकपटक हारको मुख देखिसकेको मनोजको लागि ५ वर्षपछि नयाँ अवसर जुरेको छ । पछिल्लो निर्वाचनमा पार्टीकै वरिष्ठ नेताहरुबाट अन्तर्घातमा परेका मनोजले यसपटक स्वतन्त्र उम्मेदवारी दिंदा पनि गठबन्धनका उम्मेदवारलाई अन्तर्घात गर्दै नेकाँ भित्रको गुट उपगुटले उनलाई प्रत्यक्ष र अप्रत्यक्ष रुपमा सहयोग गरेको छ ।
साहले निर्वाचनको क्रममा २१ बुँदे घोषणापत्र जारी गर्दै आफ्ना प्रतिबद्धताहरु सार्वजनिक गरेका थिए । उनले जनकपुरको सबैभन्दा प्रमुख समस्या फोहोरमैला व्यवस्थापनदेखि लामखुट्े नियन्त्रण र छाडा चौपायालगायतको व्यवस्थापनमा ठोस योजना ल्याउने बताएका छन् ।
मेयरका प्रत्यासी मनोज साह र उपप्रमुखका प्रत्यासी किशोरी साह
प्रतिक्रिया दिनुहोस !
