दमक : झापाको बेग्लाबेग्लै स्थानमा सोमबार राति भएको दुर्घटनामा परी दुई जनाको मृत्यु भएको छ । झापा बाह्रदशी–६ डाँगीबारी भित्री सडकमा मे १ प २९४३ नम्बरको मोटरसाइकल दुर्घटना हुँदा मोटरसाइकलका चालक ४० वर्षीय सेनकुवा राजवंशीको मृत्यु भएको हो । कुकुर लाई जोगाउने क्रममा मोटरसाइकल अनियन्त्रित हुँदा उनी गम्भीर घाइते भएका थिए ।
राति ११ बजेको समयमा कुकुरलाई जोगाउने क्रममा लडेका राजवंशीको टाउको र छातीमा गम्भीर चोट लागेको थियो । उपचारका लागि बिएनसी अस्पताल लैजादै गर्दा बाटैमा उनको मृत्यु भएको इलाका प्रहरी कार्यालय घैलाडुब्बाले जनाएको छ । घटना सम्बन्धमा थप अनुसन्धान कार्य भइरहको प्रहरीले जनाएको छ ।
त्यस्तैगरी झापा शिवसतासी–८ झिलझिलेमा मे५प ६८०९ नम्बरको मोटरसाइकलले ठक्कर दिएर भारत बिरपुर घर भई झापा शिवसतासी–८ झिलझिले चोकस्थित समिर ग्यारेजमा मिस्त्री काम गर्ने १९ वर्षीय मोहमद सहनीको मृत्यु भएको छ ।
सहनीलाई राति ९ बजे बाटो काट्नेक्रममा मोटरसाइकलले ठक्कर दिएको थियो । ठक्करबाट गम्भीर घाइते भएका पैदलयात्री सहनीको उपचारका क्रममा विएनसी अस्पताल विर्तामोडमा मृत्यु भएको इलाका प्रहरी कार्यालय झिलझिलेले जानकारी दिएको छ । ठक्कर दिने मोटरसाइकलका चालक शिवसतासी–८ बस्ने रोजल गजमेरलाई प्रहरीले अनुसन्धानका लागि नियन्त्रणमा लिएको छ ।
प्रतिक्रिया दिनुहोस !
